ایچ آر ٹی ڈیمینشیا کے امکانات کو کم یا زیادہ نہیں کرتی: تحقیق

ایک نئی سائنسی تحقیق میں یہ بات سامنے آئی ہے کہ ہارمون ری پلیسمنٹ تھراپی (ایچ آر ٹی) کا استعمال ڈیمینشیا کے خطرے کو نہ تو کم کرتا ہے اور نہ ہی بڑھاتا ہے۔

تحقیق کے مطابق مینوپاز سے گزرنے والی خواتین میں ایچ آر ٹی ادویات کے استعمال اور ڈیمینشیا لاحق ہونے کے امکانات کے درمیان کوئی واضح تعلق ثابت نہیں ہو سکا۔ اس حوالے سے کیے گئے جامع تجزیے میں اس بیماری کے خطرات سے متعلق کوئی قابلِ اعتماد شواہد نہیں ملے۔

اس ریویو میں برطانیہ، آئرلینڈ، سوئٹزرلینڈ، آسٹریلیا اور چین سے تعلق رکھنے والے محققین کی ٹیم نے 10 مختلف مطالعات کا جائزہ لیا، جن میں مجموعی طور پر 10 لاکھ سے زائد خواتین شامل تھیں۔

سائنس دانوں کا کہنا ہے کہ ہارمون ری پلیسمنٹ تھراپی کو اس کے ممکنہ فوائد اور نقصانات کی بنیاد پر تجویز کیا جانا چاہیے، نہ کہ ڈیمینشیا سے بچاؤ کے مقصد کے تحت۔

ماہرین کو امید ہے کہ اس تحقیق کے نتائج عالمی ادارۂ صحت سمیت دیگر طبی اداروں کے لیے ڈیمینشیا اور مینوپاز سے متعلق علاج کی ہدایات مرتب کرنے میں مددگار ثابت ہوں گے