مولانا فضل الرحمن نے جے یو آئی کی مرکزی مجلسِ عمومی کا اجلاس 19 اور 20 ستمبر کو پشاور میں طلب کر لیا

پشاور: جمعیت علمائے اسلام (جے یو آئی) کے سربراہ مولانا فضل الرحمن نے پارٹی کی مرکزی مجلسِ عمومی (مرکزی کونسل) کا دو روزہ اہم اور اعلیٰ سطحی اجلاس 19 اور 20 ستمبر کو پشاور میں باضابطہ طور پر طلب کر لیا ہے۔

جے یو آئی کے مرکزی ترجمان اسلم غوری کے مطابق اس اہم ترین اجلاس میں ملک کو درپیش معاشی، انتظامی اور امن و امان کے درپیش چیلنجز سمیت آئندہ کے سیاسی لائحہ عمل کا جامع جائزہ لیا جائے گا۔

 ترجمان کے مطابق ملک میں نئے صوبوں کی تشکیل اور انتظامی یونٹس کے قیام سے متعلق جاری بحث پر پارٹی کی باضابطہ اور حتمی رائے کا تعین کیا جائے گا۔ ملک کے مختلف صوبوں میں متوقع آئندہ بلدیاتی انتخابات کے حوالے سے صوبائی تنظیمی ڈھانچوں کی تیاریوں اور انتخابی حکمتِ عملی کا جائزہ لیا جائے گا۔خیبر پختونخوا اور بلوچستان سمیت ملک بھر میں امن و امان کی تشویشناک صورتحال پر تفصیلی غور و خوض کیا جائے گا۔ جے یو آئی کی مرکزی قیادت ملکی سیاست کی موجودہ صورتحال کے ساتھ ساتھ مشرقِ وسطیٰ اور خطے کے بین الاقوامی و جیو پولیٹیکل حالات پر بھی بحث کرے گی۔اجلاس کے اختتام پر مولانا فضل الرحمن پارٹی کی مرکزی کونسل کے فیصلوں اور آئندہ کی ملک گیر سیاسی حکمتِ عملی کا باقاعدہ اعلان کریں گے۔