ناروے کے بادشاہ کی آخری رسومات کے دو دن بعد شہزادی بھی چل بسیں

ناروے کے آنجہانی بادشاہ ہیرالڈ پنجم کی آخری رسومات کے محض دو دن بعد ان کی بڑی بہن، 94 سالہ شہزادی آسٹرڈ انتقال کر گئی ہیں۔ ناروے کے نئے بادشاہ ہاکون ہشتم نے انہیں شاندار الفاظ میں خراجِ عقیدت پیش کرتے ہوئے کہا کہ شہزادی نے اپنی طویل عمر میں شاہی خاندان اور عوام کی بے لوث اور فرض شناسی کے ساتھ خدمت کی۔ واضح رہے کہ بادشاہ ہیرالڈ کا انتقال گزشتہ ماہ 89 برس کی عمر میں ہوا تھا، اور بدھ کے روز ان کی آخری رسومات میں شہزادی آسٹرڈ کی شرکت ان کی زندگی کی آخری عوامی تقریب ثابت ہوئی۔ نارویجن وزیراعظم جوناس گار ستورے نے اعلان کیا ہے کہ شہزادی کی تدفین سرکاری اعزاز و اخراجات کے ساتھ کی جائے گی اور ان کے احترام میں قومی پرچم سرنگوں رہے گا۔

شہزادی آسٹرڈ سابق بادشاہ اولاف پنجم کی آخری زندہ اولاد تھیں اور انہوں نے 1954 میں اپنی والدہ کے انتقال کے بعد محض 22 سال کی عمر میں ناروے کی خاتونِ اول کی ذمہ داریاں سنبھالی تھیں، کیونکہ ان کے والد نے دوبارہ شادی نہیں کی تھی۔ یہ منصب انہوں نے 1968 میں اپنے بھائی ہیرالڈ کی شادی تک برقرار رکھا۔ شاہی خاندان کو اس غم سے ایسے وقت میں گزرنا پڑ رہا ہے جب وہ حالیہ عرصے میں مختلف متنازع واقعات اور عوامی آزمائشوں کی زد میں رہا ہے، جن میں ملکہ میٹ میریٹ کے جیفری ایپسٹین کے ساتھ ماضی کے روابط کے انکشافات اور ان کے بیٹے ماریوس بورگ ہوئیبی کو زیادتی کیسز میں ملنے والی قید کی سزا شامل ہے۔ شہزادی آسٹرڈ کی رحلت پر ملک بھر میں سوگ کی کیفیت ہے۔