پرائیویٹ حج سکیم: 7600 عازمین کی بکنگ مکمل ہو چکی: ترجمان مذہبی امور

اسلام آباد: وزارتِ مذہبی امور کے ترجمان کے مطابق ’پاک حج ایپ‘ اور آن لائن حج پورٹل کے ذریعے پرائیویٹ حج سکیم کی بکنگ کا عمل کامیابی سے جاری ہے، جس کے تحت اب تک 7 ہزار 600 عازمینِ حج اپنی بکنگ مکمل کر چکے ہیں۔

ترجمان مذہبی امور کے جاری کردہ بیان کے مطابق پرائیویٹ حج سکیم کے تحت 64 ہزار حج نشستیں تاحال دستیاب ہیں۔ اس کے علاوہ 25 منظور شدہ اور منظم کمپنیوں کو حج پورٹل کے ڈیجیٹل نظام کے ذریعے 6 ارب 88 کروڑ روپے کی رقم موصول ہو چکی ہے۔

وزارت کے ترجمان نے بتایا کہ پرائیویٹ حج کی بکنگ کی آخری تاریخ 20 نومبر مقرر کی گئی ہے۔ عازمین کو سہولت فراہم کرنے کے لیے 25 منظم کمپنیوں کی جانب سے 2 ہزار سے زائد مختلف حج پیکیجز متعارف کروائے گئے ہیں تاکہ شہری اپنی ترجیحات کے مطابق انتخاب کر سکیں۔

ترجمان نے عوام الناس کو خبردار کرتے ہوئے واضح کیا کہ پرائیویٹ حج کی بکنگ اور تمام واجبات کی ادائیگی صرف اور صرف سرکاری ’پاک حج ایپ‘ اور حج پورٹل کے ذریعے ہی ممکن ہے۔ انہوں نے شہریوں کو ہدایت کی کہ وہ کسی بھی قسم کے دھوکے سے بچنے کے لیے پورٹل کے علاوہ کسی دوسرے فرد یا غیر متعلقہ کمپنی کو حج کے واجبات یا نقد رقم ہرگز جمع نہ کروائیں۔