فرانس میں فراری چلانے والا شخص بظاہر بےروزگار اور کنگال

فرانس، ووکلیز: حال ہی میں فرانسیسی پولیس نے ایک سرخ فیراری فورٹوفینو تقریباً 250 کلومیٹر فی گھنٹہ کی رفتار سے چلانے والے شخص کو روکا، تو انہیں حیرت ہوئی کہ ڈرائیور ایک بےگھر اور نادار شخص تھا جو سرکاری امداد پر گزارا کر رہا تھا۔

پوچھ گچھ کے دوران اس شخص نے بتایا کہ اس کے پاس نہ ملازمت ہے، نہ کوئی اثاثہ اور نہ کوئی ذریعہ آمدنی ہے، حالانکہ وہ تقریبا 2 لاکھ 50 ہزار ڈالر مالیت کی فیراری چلا رہا تھا۔

ابتدائی تفتیش سے معلوم ہوا کہ یہ شخص کئی سالوں سے سرکاری ویلفیئر سے حاصل ہونے والی آمدنی پر گزارا کر رہا تھا۔ جب گاڑی کے بارے میں پوچھا گیا، تو اس نے کہا کہ یہ اس کی والدہ کی ہے، تاہم ریکارڈ سے پتہ چلا کہ گاڑی ایک رئیل اسٹیٹ کمپنی کے نام رجسٹرڈ تھی جسے وہ، اس کی والدہ اور دو بہن بھائی چلا رہے تھے۔

بعد ازاں تفتیش میں انکشاف ہوا کہ خاندان نے حکومتی فنڈز ہتھیانے اور آمدنی ظاہر نہ کرنے کے ذریعے ٹیکس سے بچنے کا منصوبہ بنایا تھا۔ اس دھوکہ دہی کے نتیجے میں یہ خاندان پُرتعیش زندگی گزار رہا تھا، جبکہ سرکاری ریکارڈ میں وہ بےروزگار اور دیوالیہ تھے اور اسی وجہ سے انہیں سرکاری مالی امداد مل رہی تھی۔

مجموعی طور پر دھوکہ بازوں نے سماجی مراعات کی مد میں کم از کم 1.8 ملین یورو کا غبن کیا، اور اس کے علاوہ 1.6 ملین یورو (1.9 ملین ڈالر) غیر ظاہر شدہ آمدنی حاصل کی۔ بعد ازاں پولیس نے اس خاندان کے تمام افراد کو گرفتار کر کے مقدمہ درج کر لیا۔