چین: آتش بازی کا سامان بنانے والی فیکٹری میں دھماکے سے 21 ہلاک، 61 زخمی

چین کے صوبہ ہونان کے علاقے لیویانگ میں واقع آتش بازی کی ایک فیکٹری میں شدید دھماکہ ہوا ہے، جس کے نتیجے میں کم از کم 21 افراد ہلاک اور 61 زخمی ہو گئے ہیں۔ دھماکہ اس قدر شدید تھا کہ فیکٹری کی عمارت ملبے کا ڈھیر بن گئی اور قریبی عمارتوں کی چھتیں اڑنے کے ساتھ ساتھ وہاں آگ بھی بھڑک اٹھی۔ سوشل میڈیا پر سامنے آنے والی ویڈیوز میں پہاڑی علاقے سے دھوئیں کے بادل اٹھتے اور مسلسل دھماکے ہوتے دیکھے جا سکتے ہیں۔ حکومت نے امدادی کاموں کے لیے 480 سے زائد کارکنوں اور ماہرین کو روانہ کر دیا ہے، جبکہ فیکٹری کے اطراف تین کلومیٹر تک کنٹرول زون قائم کر کے آبادی کو منتقل کر دیا گیا ہے۔ پولیس نے فیکٹری انتظامیہ کے بعض ارکان کو گرفتار کر لیا ہے اور صدر شی جن پنگ نے واقعے کے ذمہ داروں سے جواب طلبی اور لاپتہ افراد کی تلاش کے لیے ہر ممکن کوشش کی ہدایت کی ہے۔