ایرانی حملوں کا بھرپور جواب، میزائل اور ڈرون تباہ، اماراتی وزارتِ دفاع کا بیان جاری

متحدہ عرب امارات کی وزارتِ دفاع نے اعلان کیا ہے کہ 4 مئی 2026 کو ملک کے فضائی دفاعی نظام نے ایران کی جانب سے داغے گئے 12 بیلسٹک میزائل، 3 کروز میزائل اور 4 بغیر پائلٹ طیاروں کو کامیابی سے نشانہ بنا کر ناکام بنا دیا۔

وزارتِ دفاع کے مطابق ان حملوں کے نتیجے میں 3 افراد معمولی زخمی ہوئے، جبکہ دفاعی نظام نے بروقت کارروائی کرتے ہوئے بڑے جانی نقصان سے بچاؤ ممکن بنایا۔

بیان میں کہا گیا ہے کہ ایران کی جانب سے جاری حملوں کے آغاز سے اب تک فضائی دفاعی نظام مجموعی طور پر 549 بیلسٹک میزائل، 29 کروز میزائل اور 2260 بغیر پائلٹ طیاروں کو تباہ کر چکا ہے۔

ان حملوں کے نتیجے میں زخمی ہونے والوں کی مجموعی تعداد 227 ہو گئی ہے، جن میں مختلف ممالک کے شہری شامل ہیں۔ شہداء کی مجموعی تعداد 3 بتائی گئی ہے، جن میں ایک مراکشی شہری بھی شامل ہے جو مسلح افواج کے ساتھ منسلک تھا۔

مزید برآں شہری ہلاکتوں کی تعداد 10 ہو چکی ہے، جن کا تعلق پاکستان، نیپال، بنگلہ دیش، فلسطین، بھارت اور مصر سے بتایا گیا ہے۔

وزارتِ دفاع نے واضح کیا ہے کہ ملک کا دفاعی نظام مکمل طور پر الرٹ اور ہر قسم کے خطرات سے نمٹنے کے لیے تیار ہے، اور ریاست کی سلامتی، خودمختاری اور استحکام کے تحفظ کے لیے ہر ممکن اقدامات جاری رکھے جائیں گے۔