پھیپھڑوں کی جگہ جگر کی بائیوپسی سے خاتون مریِضہ کی وفات، پمز ہسپتال سے جواب طلب

پھیپھڑوں کی جگہ جگر کی بائیوپسی کیے جانے سے خاتون مریضہ کی ہلاکت کے معاملے پر اسلام آباد ہیلتھ کیئر ریگولیٹری اتھارٹی (آئی ایچ آر اے) نے پمز ہسپتال سے جواب طلب کر لیا ہے۔ اتھارٹی نے پمز ہسپتال اور شعبہ پلمونولوجی کے سربراہ ڈاکٹر محمد اسرار کو 7 روز میں وضاحت پیش کرنے کی ہدایت جاری کی ہے۔

آئی ایچ آر اے نے خاتون مریضہ عابدہ پروین کا مکمل میڈیکل ریکارڈ بھی طلب کر لیا ہے جبکہ پمز ہسپتال کے ایگزیکٹو ڈائریکٹر کو باضابطہ نوٹس ارسال کر دیا گیا ہے۔

واضح رہے کہ آزاد کشمیر کے علاقے ڈڈیال سے تعلق رکھنے والی عابدہ پروین پھیپھڑوں کے مرض میں مبتلا تھیں اور انہیں 9 دسمبر کو پمز ہسپتال کے پلمونولوجی ڈیپارٹمنٹ میں داخل کیا گیا تھا۔ ایچ او ڈی پلمونولوجی ڈاکٹر محمد اسرار نے مریضہ کی پھیپھڑوں کی بائیوپسی کا فیصلہ کیا، تاہم 16 دسمبر کو مبینہ طور پر پھیپھڑوں کے بجائے مریضہ کے جگر کی بائیوپسی کر دی گئی۔

بائیوپسی کے چند گھنٹوں بعد ہی مریضہ دم توڑ گئی۔ بعد ازاں بائیوپسی رپورٹ میں انکشاف ہوا کہ ڈاکٹروں نے غلطی سے پھیپھڑوں کے بجائے جگر کا ٹشو نکال لیا تھا۔

واقعے کے بعد لواحقین نے اسلام آباد ہیلتھ کیئر ریگولیٹری اتھارٹی سے رجوع کیا اور شعبہ پلمونولوجی کے سربراہ ڈاکٹر محمد اسرار اور ڈاکٹر ہارون اشرف خان کو واقعے کا ذمہ دار قرار دیا۔ اتھارٹی کی جانب سے معاملے کی باقاعدہ تحقیقات کا آغاز کر دیا گیا ہے۔