حنا جاوید قتل کیس: مقتولہ کے بھائی کا قومی کمیشن برائے انسانی حقوق کو فوری مداخلت کیلیے دوسرا خط

حنا جاوید قتل کیس میں پیش رفت سامنے آئی ہے، جہاں مقتولہ کے بھائی نے قومی کمیشن برائے انسانی حقوق (NCHR) کو دوسرا خط ارسال کرتے ہوئے فوری مداخلت کی اپیل کی ہے۔ خط کے متن میں مؤقف اختیار کیا گیا ہے کہ کیس کے مرکزی ملزم فیصل اصغر کے بھائی کامل اصغر تفتیش پر اثر انداز ہونے اور شواہد میں ٹیمپرنگ (تبدیلی) کرنے کی مسلسل کوششیں کر رہے ہیں۔ مقتولہ کے اہلخانہ نے دعویٰ کیا ہے کہ کامل اصغر کے پولیس اور فرانزک ٹیموں سے قریبی رابطوں کے علاوہ ان کے ایسے وائس نوٹس بھی سامنے آئے ہیں جو تفتیشی عمل میں مداخلت کا واضح ثبوت ہیں۔

خط میں مقتولہ کے اہلخانہ نے قومی کمیشن اور وفاقی حکومت سے استدعا کی ہے کہ کامل اصغر کے مبینہ کردار پر متعلقہ حکام سے فوری رپورٹ طلب کی جائے۔ اہلخانہ کا کہنا ہے کہ پولیس اور دیگر اداروں کی جانب سے اب تک کی جانے والی تحقیقات غیر جانبدارانہ اور شفاف نہیں ہیں، جس کی وجہ سے انہیں مجبوراً بار بار قومی کمیشن سے رجوع کرنا پڑ رہا ہے۔ انہوں نے کیس کی شفاف، آزادانہ اور غیر جانبدارانہ تحقیقات کو یقینی بنانے کے لیے فوری اور مؤثر اقدامات کا مطالبہ کیا ہے۔