نئے صوبوں کا معاملہ قومی مشاورت سے حل ہونا چاہیے: چودھری شجاعت حسین

پاکستان مسلم لیگ (قاف) کے سربراہ چودھری شجاعت حسین نے زور دیا ہے کہ ملک میں نئے صوبوں کے قیام کا معاملہ سیاسی محاذ آرائی کے بجائے قومی مشاورت اور باہمی اتفاقِ رائے سے حل ہونا چاہیے۔ انہوں نے یہ بات پاکستان مسلم لیگ سندھ کے صدر آصف جمال اور جنرل سیکرٹری آفاق خٹک سے ملاقات کے دوران کہی۔ چودھری شجاعت حسین کا کہنا تھا کہ نئے صوبوں کا فیصلہ کسی سیاسی مفاد یا وقتی نعروں کی بنیاد پر نہیں بلکہ خالصتاً قومی مفاد اور عوام کی سہولت کو مدِنظر رکھ کر کیا جانا چاہیے۔

انہوں نے مزید کہا کہ سندھ کی ترقی اور عوام کی محرومیوں کے خاتمے میں ان کی جماعت کا تاریخی کردار رہا ہے۔ بہتر طرزِ حکمرانی، بنیادی سہولیات اور فوری انصاف کی فراہمی ریاست کی اولیں ذمہ داری ہے۔ مسلم لیگ کے صدر نے واضح کیا کہ مؤثر، بااختیار اور مضبوط انتظامی یونٹس بھی موجودہ مسائل کا بہترین حل ثابت ہو سکتے ہیں، بشرطیکہ اختیارات کو نچلی سطح تک منتقل کیا جائے۔ انہوں نے تمام سیاسی جماعتوں پر زور دیا کہ وہ سیاسی انا اور صف بندیوں کو چھوڑ کر مذاکرات کی میز پر بیٹھیں، کیونکہ مضبوط صوبے اور بااختیار ادارے ہی مستحکم پاکستان کی ضمانت ہیں۔