افغانستان پاکستان کیخلاف دہشت گردی کا اہم مرکز بن چکا ہے: واشنگٹن پوسٹ

امریکی اخبار ‘واشنگٹن پوسٹ’ نے اپنی ایک خصوصی اور مفصل رپورٹ میں سنسنی خیز انکشاف کیا ہے کہ 9/11 کے واقعے کے 25 سال بعد افغانستان ایک بار پھر ‘القاعدہ’ سمیت دیگر عالمی دہشت گرد تنظیموں کے لیے مضبوط تربیتی مرکز اور محفوظ پناہ گاہ میں تبدیل ہو رہا ہے۔ رپورٹ کے مطابق، طالبان کی حکومت کے بعد القاعدہ نے افغانستان کے کم از کم 14 صوبوں میں اپنے قدم جما لیے ہیں اور وہاں 8 نئے تربیتی کیمپ قائم کیے ہیں۔ طالبان نے ان تنظیموں کے لیے ایک انتہائی سازگار اور آزادانہ (Permissive) ماحول فراہم کر رکھا ہے، جہاں القاعدہ نہ صرف اپنے ٹھکانے بحال کر رہی ہے بلکہ دیگر کالعدم تنظیموں کو تربیت اور مشاورت بھی فراہم کر رہی ہے۔

اقوامِ متحدہ کے حوالے سے واشنگٹن پوسٹ نے بتایا کہ القاعدہ کے جنگجو افغانستان میں تحریکِ طالبان پاکستان (TTP) کے 7 ہزار کے قریب جنگجوؤں کو خودکش حملوں، خفیہ کارروائیوں اور سیکیورٹی تکنیک کی تربیت دے رہے ہیں۔ ٹی ٹی پی نے افغان سرزمین کے کم از کم 4 صوبوں میں اپنے کیمپ بنا رکھے ہیں، جہاں سے پاکستانی فوجی چوکیوں اور دیگر اہداف پر سینکڑوں سرحد پار حملے کیے گئے ہیں۔ اس کے علاوہ ‘داعش خراسان’ نے بھی شمالی افغانستان کو اپنا مرکز بناتے ہوئے 2 ہزار سے زائد نئے جنگجو بھرتی کر لیے ہیں۔ رپورٹ میں خبردار کیا گیا ہے کہ امریکی انٹیلی جنس صلاحیتوں میں کمی کے باعث ان بڑھتے ہوئے مراکز کی نگرانی مشکل ہو چکی ہے، جو خطے اور عالمی سلامتی کے لیے ایک نیا اور شدید چیلنج بن کر ابھر رہے ہیں۔