مصطفیٰ کمال جس دن مناظرے کا کہیں، میں تیار ہوں: مرتضیٰ وہاب

میئر کراچی بیرسٹر مرتضیٰ وہاب نے شادمان ٹاؤن میں ایک کروڑ 45 لاکھ روپے کی لاگت سے مکمل ہونے والے پارک اور آئی ٹی سینٹر کی بحالی کے منصوبے کا افتتاح کر دیا ہے۔ اس موقع پر گفتگو کرتے ہوئے انہوں نے بتایا کہ ایک ایکڑ سے زائد رقبے پر قائم کچرے کے ڈھیر کو ایک جدید پارک میں تبدیل کیا گیا ہے، جہاں بچوں کے پلے ایریا اور 100 سے زائد درخت لگائے گئے ہیں۔ اس کے علاوہ 180 مربع میٹر پر مشتمل آئی ٹی سینٹر میں نوجوانوں کے لیے مصنوعی ذہانت (AI) اور فری لانسنگ کے مفت کورسز فراہم کیے جائیں گے تاکہ انہیں جدید روزگار کے مواقع میسر آسکیں۔ میئر کراچی کا کہنا تھا کہ 15 ستمبر سے شہر میں مزید ترقیاتی کاموں کا آغاز کیا جائے گا اور اب KMC کے پاس وسائل کا رونا رونے کے بجائے عملی کام جاری ہے۔

سیاسی رہنما اور ایم کیو ایم کے رہنماء مصطفیٰ کمال کے بیان پر شدید ردِعمل دیتے ہوئے مرتضیٰ وہاب نے انہیں مناظرے کا چیلنج دے دیا۔ انہوں نے کہا کہ مصطفیٰ کمال جس دن کہیں وہ مناظرے کے لیے تیار ہیں، کیونکہ وہ خود گراؤنڈ پر موجود ہیں جبکہ ان کے مخالفین ایئر کنڈیشنڈ کمروں میں پریس کانفرنسز کرتے ہیں۔ میئر کراچی نے مصطفیٰ کمال سے 300 ارب روپے کی منظوری کے دستاویزات دکھانے کا مطالبہ کرتے ہوئے کہا کہ کراچی کے شہری اب بوری بند لاشوں، پرتشدد ہڑتالوں اور پہیہ جام کی سیاست سے نجات چاہتے ہیں۔