یمن میں حکومتی فورسز اور حوثی جنگجوؤں میں جھڑپوں سے 76 ہزار افراد بے گھر

اقوامِ متحدہ کے ادارہ برائے پناہ گزین (UNHCR) نے اپنی تازہ رپورٹ میں انکشاف کیا ہے کہ یمن میں حوثی باغیوں، یمنی سرکاری افواج اور سعودی حمایت یافتہ فورسز کے درمیان جاری شدید جھڑپوں کے نتیجے میں کم از کم 76 ہزار افراد گھر بار چھوڑ کر نقل مکانی کرنے پر مجبور ہو گئے ہیں۔ اقوامِ متحدہ کے ادارے نے یمن کے موجودہ انسانی بحران کو تیزی سے بگڑتی اور پھیلتی ہوئی صورتِ حال قرار دیا ہے، جہاں مختصر عرصے میں متاثرہ افراد کی تعداد میں غیر معمولی اضافہ ریکارڈ کیا گیا ہے۔

ادارے کی سربراہ ایمی پوپ کے مطابق مغربی ساحلی علاقوں اور جنوبی تعز کے محاذوں پر لڑائی میں اچانک شدت آئی ہے، جس میں صوبہ تعز سب سے زیادہ متاثر ہوا ہے اور وہاں سے تقریباً 8 ہزار 300 خاندان (کم و بیش 50 ہزار افراد) بے گھر ہو چکے ہیں۔ رپورٹ کے مطابق نقل مکانی کی یہ لہر خاص طور پر جبل حبشی، المعافر، مقبنہ، موزع اور الوزعیہ سے دیکھی گئی ہے۔ اقوامِ متحدہ کا کہنا ہے کہ چند روز قبل بے گھر افراد کی تعداد 46 ہزار تھی جو اب بڑھ کر 76 ہزار تک جا پہنچی ہے، جو کہ گزشتہ ہفتے کے اعداد و شمار کے مقابلے میں چار گنا زیادہ ہے