وفاقی وزیر داخلہ محسن نقوی کے پولیس ملازمین کی فلاح و بہبود کے لیے بڑے اعلانات

اسلام آباد میں وفاقی وزیرِ داخلہ محسن نقوی نے نیشنل پولیس فاؤنڈیشن کا دورہ کیا جہاں انہوں نے اعلیٰ سطحی اجلاس کی صدارت کی اور پولیس ملازمین کی فلاح و بہبود کیلئے اہم فیصلوں کا اعلان کیا۔

اجلاس میں فیصلہ کیا گیا کہ نیشنل پولیس اکیڈمی میں زیرِ تربیت اے ایس پیز کو ہر سال آسان اور کم اقساط پر پلاٹس فراہم کیے جائیں گے۔ اس کے علاوہ پاکستان بھر سے ہر سال 10 انسپکٹرز، سب انسپکٹرز اور اسسٹنٹ سب انسپکٹرز کو سکالرشپ پر پولیس سے متعلق خصوصی کورسز کیلئے بیرونِ ملک بھیجا جائے گا۔

وفاقی وزیرِ داخلہ نے اعلان کیا کہ 15 کانسٹیبلز کے بیٹے یا بیٹیاں جو پاکستان کی بہترین جامعات میں داخلہ حاصل کریں گے، ان کے تعلیمی اخراجات نیشنل پولیس فاؤنڈیشن برداشت کرے گی۔ اسی طرح ہر سال 5 ایس پی اور ایس ایس پی رینک کے افسران کو مصنوعی ذہانت (اے آئی) میں ڈگری کیلئے بیرونِ ملک سکالرشپ پر بھیجنے کا بھی فیصلہ کیا گیا ہے۔

محسن نقوی نے نیشنل پولیس فاؤنڈیشن کے وسائل میں مزید اضافے کیلئے جامع پلان طلب کرتے ہوئے ادارے کو خسارے سے نکال کر سرپلس میں لانے پر پوری ٹیم کی کارکردگی کو سراہا۔

انہوں نے کہا کہ نیشنل پولیس فاؤنڈیشن کو پولیس ملازمین کی فلاح و بہبود کیلئے ایک مؤثر، فعال اور متحرک ادارہ بنانا حکومت کی اولین ترجیح ہے۔ اجلاس میں فاؤنڈیشن کی مجموعی کارکردگی، مستقبل کے منصوبوں اور پولیس اہلکاروں کیلئے فلاحی اقدامات پر تفصیلی بریفنگ بھی دی گئی۔