فافن نے 27ویں آئینی ترمیم پر تفصیلی رپورٹ جاری کر دی

فری اینڈ فیئر الیکشن نیٹ ورک (فافن) نے قومی اسمبلی کے 21ویں اجلاس سے متعلق اپنی تفصیلی رپورٹ جاری کردی، جس میں 27ویں آئینی ترمیم اور ایوان کی قانون سازی کے عمل کا جامع جائزہ پیش کیا گیا ہے۔

رپورٹ کے مطابق اجلاس کے دوران ستائیسویں آئینی ترمیم پر مجموعی طور پر 10 گھنٹے 4 منٹ بحث کی گئی، جس میں 57 ارکان نے حصہ لیا۔ حکومتی اراکین نے 5 گھنٹے 45 منٹ جبکہ اپوزیشن نے 4 گھنٹے 19 منٹ تک اظہارِ خیال کیا۔ ترمیم کی منظوری کے وقت ایوان میں 91 فیصد اراکین (296 ارکان) موجود تھے۔

فافن رپورٹ کے مطابق اجلاس میں مجموعی طور پر 7 قانون سازی کے مسودے منظور کیے گئے، جن میں شامل ہیں:

• پاکستان آرمی (ترمیمی) بل 2025
• پاکستان ایئر فورس (ترمیمی) بل 2025
• پاکستان نیوی (ترمیمی) بل 2025
• سپریم کورٹ پریکٹس اینڈ پروسیجر (ترمیمی) بل 2025
• پرائیویٹائزیشن کمیشن (ترمیمی) بل 2025
• ڈومیسٹک وائلنس (پروٹیکشن) بل 2024

رپورٹ میں کہا گیا ہے کہ ان میں سے پانچ بل ایک ہی روز قواعد معطل کرکے رول 288 کے تحت پیش اور منظور کیے گئے۔ فافن کے مطابق یہ سلسلہ قانون سازی کے معیاری پارلیمانی طریقہ کار پر سوالات اٹھاتا ہے۔