وفاقی آئینی عدالت نے نسلہ ٹاور مسماری کے متعلق سپریم کورٹ کے احکامات واپس لے لئے

وفاقی آئینی عدالت نے کراچی کے نسلہ ٹاور کی مسماری کا سبب بننے والے سپریم کورٹ کے 21 دسمبر 2018ء اور 22 جنوری 2019ء کے احکامات اور ان کے تحت ہونے والی تمام کارروائیاں واپس لے لی ہیں۔ عدالت نے اپنے تاریخی فیصلے میں واضح کیا ہے کہ غیر قانونی تعمیرات کے خلاف کارروائی کا اختیار بنیادی طور پر صوبائی حکومت اور متعلقہ اداروں کا ہے، عدلیہ کا نہیں؛ لہٰذا عدالتیں اپنے سامنے موجود تنازع تک محدود رہیں اور غیر ضروری معاملات میں مداخلت سے گریز کریں۔ فیصلے کے مطابق، سپریم کورٹ نے زیرِ سماعت مقدمے سے آگے بڑھ کر وسیع احکامات جاری کیے، جبکہ سندھ بلڈنگ کنٹرول اتھارٹی (SBCA) کی رپورٹس کی بنیاد پر قانونی تقاضے اور منصفانہ قانونی کارروائی (Due Process) کو پورا کیے بغیر مسماری کے احکامات نہیں دیے جا سکتے۔ آئینی عدالت نے واشگاف الفاظ میں کہا کہ ان کا مقصد غیر قانونی تعمیرات کو تحفظ دینا نہیں بلکہ صرف قانون کے مطابق کارروائی کو یقینی بنانا ہے، اور سندھ حکومت اس کی نگرانی کی آئینی پابند ہے۔ دوسری جانب، جسٹس سید ارشد حسین شاہ نے فیصلے میں اضافی نوٹ لکھتے ہوئے تاکید کی کہ شہریوں کے بنیادی حقوق اور عوامی سہولیات کا تحفظ ریاست کی اولین ذمہ داری ہے، اس لیے پارکس، کھیل کے میدان، گرین بیلٹس، فٹ پاتھ اور ساحل جیسے عوامی مقامات کو ہر قسم کے قبضوں سے محفوظ رکھا جائے۔