پولیس کی ترنڈہ محمد پناہ میں کارروائی، 37 کلو سمگل شدہ چاندی برآمد

پولیس نے ایک کامیاب کارروائی کے دوران گاڑی کے ٹائروں میں مہارت سے چھپائی گئی 37 کلو گرام اسمگل شدہ غیر ملکی چاندی کی اینٹیں برآمد کر لی ہیں۔ پولیس حکام کے مطابق یہ چاندی کوئٹہ سے پشاور منتقل کی جا رہی تھی کہ خفیہ اطلاع پر ناکہ بندی کے دوران گاڑی کو روک کر تلاشی لی گئی، جس کے نتیجے میں کروڑوں روپے مالیت کی چاندی برآمد ہوئی۔ کارروائی کے دوران گاڑی میں سوار دو ملزمان کو گرفتار کر کے گاڑی کو قبضے میں لے لیا گیا ہے اور تھانے میں مقدمہ درج کر لیا گیا ہے۔ کسٹم حکام کا کہنا ہے کہ برآمد شدہ چاندی کی عالمی مارکیٹ میں مالیت 3 کروڑ روپے سے زائد ہے اور ملزمان اس چاندی سے متعلق کوئی قانونی دستاویزات یا ریکارڈ پیش کرنے میں ناکام رہے۔ پولیس نے برآمد شدہ چاندی اور گاڑی کو مزید قانونی کارروائی کے لیے کسٹم انٹیلی جنس کے حوالے کر دیا ہے۔