عوامی مسائل نظرانداز، حافظ نعیم الرحمان کا ملک گیر احتجاج کا اعلان

امیر جماعت اسلامی حافظ نعیم الرحمان نے حکومت پر عوامی مسائل کو مکمل طور پر نظر انداز کرنے کا الزام لگاتے ہوئے ملک گیر احتجاجی تحریک کا اعلان کر دیا ہے۔ صوبائی دارالحکومت میں میڈیا سے گفتگو کرتے ہوئے انہوں نے کہا کہ حکومت نے جنگی حالات اور عالمی مارکیٹ کا جھوٹا جواز بنا کر پٹرولیم مصنوعات کی قیمتوں میں ظالمانہ اضافہ کیا ہے، جبکہ عوام پہلے ہی مہنگائی، بجلی اور گیس کے بھاری بلوں سے شدید پریشان ہیں۔ حافظ نعیم الرحمان نے دعویٰ کیا کہ حکومت پٹرول پر بھاری لیوی کی مد میں اربوں روپے وصول کرنے کے باوجود توانائی کے شعبے اور ریفائنریز میں کوئی بہتری نہیں لا سکی اور غریب متوسط طبقے پر ٹیکسوں کا بوجھ بڑھایا جا رہا ہے۔ انہوں نے آئی پی پیز (IPPs) کے معاہدوں اور تعلیمی نظام میں ناکامی کو بھی سخت تنقید کا نشانہ بنایا اور کہا کہ پنجاب سمیت ملک بھر میں لاکھوں بچے اسکولوں سے باہر ہیں۔ امیر جماعت اسلامی نے کارکنوں اور نوجوانوں کو متحرک ہونے کی ہدایت کرتے ہوئے کہا کہ جلد چھوٹے بڑے شہروں میں احتجاج شروع کیا جائے گا تاکہ عوامی طاقت سے حکومت کو پالیسیاں بدلنے پر مجبور کیا جا سکے