گلگت بلتستان کی تعمیر و ترقی حکومت کی اولین ترجیحات ہے: وزیراعظم

وزیر اعظم محمد شہباز شریف نے کہا ہے کہ گلگت بلتستان کی تعمیر و ترقی وفاقی حکومت کی اولین ترجیحات میں شامل ہے، جہاں بنیادی ڈھانچے، مواصلات، توانائی، تعلیم، صحت اور سیاحت کے فروغ پر خصوصی توجہ دی جا رہی ہے۔ اسلام آباد میں مسلم لیگ (ن) سے تعلق رکھنے والے گلگت بلتستان اسمبلی کے اراکین سے ملاقات کے دوران گفتگو کرتے ہوئے انہوں نے خطے کے عوام کی حب الوطنی کو سراہا اور واضح کیا کہ سیاسی وابستگی سے بالاتر ہو کر حکومت کا مقصد عوامی مسائل کا حل اور نوجوانوں کو جدید فنی تربیت و روزگار کی فراہمی ہے۔ وزیر اعظم نے اعلان کیا کہ گلگت بلتستان میں 4 دانش اسکول تعمیر کے آخری مراحل میں ہیں جن میں آئندہ سال کلاسز کا آغاز ہو جائے گا، جبکہ شمسی توانائی سے 100 میگاواٹ بجلی پیدا کرنے کے منصوبے اور گلیشیئرز سے متعلق پیشگی اطلاع کے نظام پر تیزی سے کام جاری ہے۔ بہتر طرزِ حکمرانی اور اراکین کی تجاویز کا جائزہ لینے کے لیے وزیر اعظم نے نائب وزیر اعظم اسحاق ڈار کی سربراہی میں ایک اعلیٰ سطحی کمیٹی قائم کرنے کی ہدایت کی ہے، جس میں وفاقی وزراء امیر مقام اور رانا ثناء اللہ بھی شامل ہوں گے۔