’جنگ ابھی ختم نہیں ہوئی‘، نیتن یاہو کی ایران کو سخت وارننگ

اسرائیلی وزیراعظم بنیامین نیتن یاہو نے ایران کو ایک بار پھر سخت وارننگ دیتے ہوئے کہا ہے کہ دونوں ممالک کے درمیان جاری تنازع ابھی ختم نہیں ہوا اور اسرائیل ہر ممکنہ صورتحال سے نمٹنے کے لیے دفاعی طور پر مکمل تیار ہے۔ بین الاقوامی میڈیا رپورٹس کے مطابق، اسرائیلی فضائیہ کی گریجویشن تقریب سے خطاب کرتے ہوئے نیتن یاہو کا کہنا تھا کہ اسرائیل کی قومی سلامتی کا سب سے اہم ستون اس کی فضائی برتری ہے، جسے ہر صورت برقرار رکھا جائے گا۔ انہوں نے دعویٰ کیا کہ حالیہ کشیدگی کے دوران ایران کے دفاعی اور عسکری نظام کو شدید نقصان پہنچا، تاہم اب بھی نئے چیلنجز سامنے آ رہے ہیں۔ اسرائیلی وزیراعظم نے واشگاف الفاظ میں واضح کیا کہ ان کی حکومت کی پالیسی میں کوئی تبدیلی نہیں آئی اور تہران کو کسی بھی قیمت پر جوہری ہتھیار حاصل کرنے کی اجازت نہیں دی جائے گی، چاہے اس مقصد کے لیے کوئی بین الاقوامی معاہدہ موجود ہو یا نہ ہو۔ یہ بیان ایک ایسے وقت میں سامنے آیا ہے جب امریکا اور ایران کے درمیان جنگ بندی کا مفاہمتی فریم ورک شدید دباؤ کا شکار ہے اور مشرقِ وسطیٰ میں دوبارہ کشیدگی بڑھنے کے خدشات ظاہر کیے جا رہے ہیں۔