نجکاری کمیشن بورڈ کا اہم فیصلہ: اسلام آباد ایئرپورٹ نجی شعبے کے حوالے کرنے کے لیے ٹرانزیکشن ایڈوائزری معاہدے کی منظوری

اسلام آباد: اسلام آباد انٹرنیشنل ایئرپورٹ کو نجی شعبے کے حوالے کرنے (آؤٹ سورسنگ) کے عمل میں ایک اہم اور بڑی پیش رفت سامنے آئی ہے۔ نجکاری کمیشن بورڈ نے ایشیائی ترقیاتی بینک (ADB) کو اس منصوبے کے لیے مالیاتی مشیر (Financial Advisor) مقرر کرنے اور ٹرانزیکشن ایڈوائزری سروسز کے معاہدے کی باقاعدہ منظوری دے دی ہے۔ نجکاری کمیشن کے مطابق، اسلام آباد ایئرپورٹ کی آؤٹ سورسنگ کا یہ عمل مکمل طور پر شفاف اور مسابقتی بولی (Competitive Bidding) کے ذریعے انجام دیا جائے گا، جس کے تحت نجی شعبے کے کسی بھی اہل اور تجربہ کار آپریٹر کو طویل المدتی رعایتی فریم ورک کے تحت ایئرپورٹ چلانے کا موقع فراہم کیا جائے گا۔ کمیشن کا کہنا ہے کہ اے ڈی بی کی عالمی مہارت کو بروئے کار لاتے ہوئے اس پورے عمل کو تیز رفتار اور شفاف بنایا جائے گا۔ علاوہ ازیں، نجکاری کمیشن بورڈ نے اپنے اجلاس میں تین سالہ مدت کے لیے بیرونی آڈیٹرز کی تقرری کی منظوری بھی دی ہے، جس کے تحت ‘بی ڈی او ابراہیم اینڈ کمپنی’ کو مالیاتی سال 26-2025 سے 28-2027 تک کے لیے بیرونی آڈیٹر مقرر کیا گیا ہے۔