بہاولپور کے شیر باغ چڑیا گھر میں مورنی نامی شیرنی پر اسرار طور پر ہلاک

بہاولپور کے تاریخی شیر باغ چڑیا گھر میں ‘مورنی’ نامی مادہ شیر (شیرنی) پراسرار طور پر ہلاک ہو گئی ہے۔ چڑیا گھر انتظامیہ اور ذرائع کے مطابق، شیرنی صبح گیارہ بجے تک بالکل چاق و چوبند اور صحت مند تھی، تاہم وہ اچانک بے ہوش ہو کر زمین پر گری اور دم توڑ گئی۔ چڑیا گھر میں تعینات ویٹرنری ڈاکٹر نے فوری معائنے کے بعد شیرنی کی موت کی تصدیق کی۔ ماہرینِ حیاتِ وحش کا کہنا ہے کہ شیرنی کی اچانک ہلاکت ممکنہ طور پر شدید گرمی (ہیٹ اسٹروک) کے باعث حرکتِ قلب بند ہونے (ہارٹ اٹیک) سے ہوئی ہے۔ پوسٹ مارٹم کی کارروائی مکمل کرنے کے بعد شیرنی کو چڑیا گھر کے احاطے میں ہی سپردِ خاک کر دیا گیا ہے۔ دوسری جانب ماہرین نے اس اچانک ہلاکت پر چڑیا گھر میں شیروں کے پنجروں میں گرمی سے بچاؤ کے نامناسب انتظامات کا امکان بھی ظاہر کیا ہے۔ ‘مورنی’ کی موت کے بعد بہاولپور چڑیا گھر میں شیروں کی مجموعی تعداد کم ہو کر 18 رہ گئی ہے۔