جدید جوڈیشل ٹاور منصوبے کا آغاز، چیف جسٹس عالیہ نیلم کل سنگِ بنیاد رکھیں گی

لاہور میں تمام عدالتوں کو ایک چھت تلے اکٹھا کرنے کے عظیم مشن کے تحت چیف جسٹس لاہور ہائیکورٹ جسٹس عالیہ نیلم کل ایوانِ عدل اور سیشن کورٹ کا اہم دورہ کریں گی، جہاں وہ متعدد جدید منصوبوں کا افتتاح اور سنگِ بنیاد رکھیں گی۔ چیف جسٹس سب سے پہلے ایوانِ عدل میں ماتحت عدالتوں کو ماحول دوست توانائی پر منتقل کرنے کے لیے ‘سولرائزیشن منصوبے’ کا افتتاح کریں گی، جس کے بعد وہ 24 ارب روپے کی خطیر لاگت سے تعمیر ہونے والے اسٹیٹ آف دی آرٹ ‘جوڈیشل ٹاورز’ کا سنگِ بنیاد رکھیں گی۔ 30 ماہ کی ریکارڈ مدت میں مکمل ہونے والے اس منصوبے کے تحت دو فلک بوس جوڈیشل ٹاورز تعمیر کیے جائیں گے جن میں 184 جدید عدالتیں قائم ہوں گی۔ اس کے علاوہ منصوبے میں 476 گاڑیوں کی گنجائش کا پارکنگ پلازہ، تین بیسمنٹ فلورز پر مشتمل 10 منزلہ ایڈمن بلاک، دائری برانچ، جدید ریکارڈ روم اور اے ڈی سی آر (ADCR) سینٹر بھی بنایا جائے گا، جس سے سائلین اور وکلاء کو تمام عدالتی سہولیات ایک ہی جگہ میسر آئیں گی۔