ملک میں ہر دوسری خاتون انیمیا کا شکار، علامات اور علاج کیا ہے؟

پاکستان میں انیمیا ایک سنگین مگر خاموش صحتِ عامہ کا بحران بنتا جا رہا ہے، جس کے اثرات نہ صرف موجودہ آبادی بلکہ آئندہ نسلوں تک پھیلنے کا خدشہ ہے۔ دستیاب اعداد و شمار کے مطابق ملک میں 15 سے 49 برس کی 41 فیصد خواتین خون کی کمی کا شکار ہیں، جبکہ ہر سال 9 لاکھ سے زائد حاملہ خواتین انیمیا میں مبتلا ہو جاتی ہیں۔

طبی تحقیق کے مطابق خواتین میں آئرن کی کمی معمول بن چکی ہے، جس کے باعث تھکاوٹ، سانس پھولنا، کمزوری اور چکر آنا عام علامات کے طور پر سامنے آ رہی ہیں۔ ماہرین صحت کا کہنا ہے کہ انیمیا حمل کے دوران پیچیدگیوں کو جنم دیتا ہے، جو ماں اور بچے دونوں کے لیے خطرناک ثابت ہو سکتی ہیں۔

پاکستان میں فی عورت بچوں کی تعداد اب بھی زیادہ ہے۔ حمل کے دوران کم وقفہ اور ناکافی خوراک عورت کے جسم میں غذائی ذخائر کو تیزی سے ختم کر دیتی ہے۔ طبی ماہرین کے مطابق جیسے جیسے گھر میں افراد کی تعداد بڑھتی ہے، خوراک کم پڑ جاتی ہے اور صحت کی سہولیات محدود ہو جاتی ہیں۔ ایسے میں ماں سب کو کھانا فراہم کرتی ہے مگر خود غذائی قلت کا شکار رہ جاتی ہے، جو انیمیا کو مزید بڑھا دیتی ہے۔

آبادی کا یہ دباؤ صرف ماؤں تک محدود نہیں۔ پاکستان بچوں میں انیمیا کے حوالے سے جنوبی ایشیا میں دوسرے نمبر پر ہے۔ ملک میں ہر سال تقریباً 28 لاکھ بچوں میں خون کی کمی کی تشخیص ہوتی ہے۔ ماہرین کے مطابق انیمیا زدہ ماؤں سے پیدا ہونے والے بچے اکثر کم وزن ہوتے ہیں، سیکھنے کی صلاحیت میں پیچھے رہ جاتے ہیں اور بیماریوں کا زیادہ شکار بنتے ہیں۔

معالجین کا کہنا ہے کہ اس نہ ختم ہونے والے چکر کو توڑنے کے لیے آئرن سپلیمنٹس کے ساتھ متوازن غذا سے متعلق آگاہی ناگزیر ہے، تاہم سب سے مؤثر قدم فیملی پلاننگ کی سہولتوں کو عام کرنا ہے۔

ماہرین صحت اس امر پر متفق ہیں کہ انیمیا محض ایک طبی مسئلہ نہیں بلکہ آبادی کے بے قابو دباؤ، غربت اور عدم منصوبہ بندی سے جڑا ایک بڑا سماجی چیلنج ہے۔ ان کا کہنا ہے کہ جب آبادی کا دباؤ کم ہوگا تو ہر عورت کو مناسب خوراک اور معیاری صحت کی سہولیات میسر آ سکیں گی، جس کے نتیجے میں مضبوط ماں، صحت مند بچہ اور ایک طاقتور پاکستان کی بنیاد رکھی جا سکے گی۔