پی ٹی آئی وفد کا آج سپیکر قومی اسمبلی ایاز صادق سے ملاقات کا فیصلہ

تحریک انصاف کے وفد نے آج سپیکر قومی اسمبلی سردار ایاز صادق سے ملاقات کا فیصلہ کر لیا ہے۔ اس حوالے سے بیرسٹر گوہر کی سربراہی میں اسلام آباد میں اہم اجلاس منعقد ہوا جس میں سلمان اکرم راجہ، اسد قیصر، جنید اکبر اور دیگر رہنماؤں نے شرکت کی۔

ذرائع کے مطابق سپیکر سے ملاقات کے دوران محمود خان اچکزئی کی بطور اپوزیشن لیڈر تقرری کا نوٹیفکیشن جاری کرنے کا مطالبہ کیا جائے گا۔
ادھر حکومت اور تحریک انصاف کے درمیان ممکنہ مذاکرات کے معاملے پر وزیراعظم شہباز شریف نے سپیکر قومی اسمبلی کو گرین سگنل دے دیا ہے جبکہ حکومتی وفد سپیکر کی درخواست پر مذاکرات کیلئے آمادہ ہے۔

حکومتی ذرائع کا کہنا ہے کہ مذاکرات صرف پی ٹی آئی کے منتخب نمائندوں سے ہوں گے، غیر منتخب افراد سے بات چیت نہیں کی جائے گی۔
دوسری جانب سپیکر آفس ذرائع کے مطابق ابھی تک تحریک انصاف کی جانب سے مذاکرات کیلئے باضابطہ رابطہ نہیں کیا گیا، تاہم اپوزیشن کی رضامندی کی صورت میں پارلیمانی کمیٹی کا اجلاس فوری طور پر بلایا جائے گا۔

پارلیمانی ذرائع کا کہنا ہے کہ سپیکر سردار ایاز صادق نے تحریک انصاف کو اپنے چیمبر میں ملاقات کی دعوت دے رکھی ہے، مگر تاحال اپوزیشن کی جانب سے رابطہ نہیں ہوا۔