اسلام آباد میں افغان شہریوں کے خلاف کریک ڈاؤن، 19 ہزار سے زائد گرفتار

وزارت داخلہ کی ہدایت پر اسلام آباد میں افغان باشندوں کے خلاف کریک ڈاؤن جاری ہے، جس کی تمام تفصیلات 365 نیوز نے حاصل کر لی ہیں۔ ذرائع کے مطابق جاری آپریشن کے دوران اب تک 19 ہزار 504 افغان شہریوں کو گرفتار کیا گیا۔

مہم کے تحت 9 ہزار 803 افغان باشندوں کو وطن واپس بھجوا دیا گیا، جبکہ 9 ہزار 545 شہریوں کو چیکنگ کے بعد رہا کر دیا گیا۔ ملک بدر کیے جانے والوں میں 5 ہزار 45 مرد، 2 ہزار 191 خواتین اور 2 ہزار 567 بچے شامل ہیں، جنہیں اسلام آباد پولیس نے واپس افغانستان روانہ کیا۔

وزارت داخلہ نے اسلام آباد پولیس کو کارروائیاں مزید تیز کرنے کی ہدایت کر دی ہے۔ ذرائع کے مطابق سب سے زیادہ افغان شہریوں کی گرفتاری رورل زون سے عمل میں آئی ہے۔