چینی شہری نے 100 دن تک 100 کلو میٹر دوڑ کر عالمی ریکارڈ اپنے نام کرلیا

چین سے تعلق رکھنے والے ہوانگ زینگ لونگ، جو ‘لانگ شاؤ’ کے نام سے مشہور ہیں، نے انسانی ہمت اور استقامت کی نئی مثال قائم کرتے ہوئے مسلسل 100 دن تک روزانہ 100 کلومیٹر دوڑنے کا حیران کن عالمی ریکارڈ اپنے نام کر لیا ہے۔ غیر ملکی میڈیا رپورٹس کے مطابق، انہوں نے چین کے شہر فوشان میں 6 دسمبر 2025 سے 15 مارچ 2026 کے درمیان مجموعی طور پر 10 ہزار کلومیٹر کا طویل فاصلہ طے کیا۔ اس غیر معمولی مہم کے دوران انہوں نے ثابت کر دکھایا کہ پختہ ارادہ ناممکن کو بھی ممکن بنا سکتا ہے۔

ہوانگ زینگ لونگ کے اس سفر کا آغاز عالمی وبا کورونا کے دور میں ہوا، جب انہوں نے دوڑنے کی باقاعدہ تیاری شروع کی اور اپنا ذاتی کاروبار بند کر کے پوری توجہ اس مشن پر مرکوز کر دی۔ انہوں نے اس چیلنج سے قبل پورے ایک سال (365 دن) تک سخت مشق کی تاکہ وہ روزانہ 100 کلومیٹر کی جسمانی مشقت برداشت کر سکیں۔ اپنی کامیابی پر گفتگو کرتے ہوئے انہوں نے کہا کہ گنیز ورلڈ ریکارڈ حاصل کرنا ان کے لیے اعزاز کی بات ہے، خاص طور پر اس لیے کہ بہت سے لوگ اسے انسانی صلاحیت سے باہر اور ناممکن قرار دے رہے تھے۔

اس ریکارڈ ساز دوڑ کے دوران ہوانگ زینگ لونگ کی صحت اور فٹنس کو برقرار رکھنے کے لیے ایک ماہر غذائیت اور پیشہ ور طبی ٹیم ہر وقت ان کے ساتھ موجود تھی، جو ان کی خوراک اور جسمانی حالت کی مسلسل نگرانی کرتی رہی۔ ان کے اس کارنامے نے دنیا بھر کے ایتھلیٹس اور فٹنس کے دلدادہ افراد کو ورطہِ حیرت میں ڈال دیا ہے اور اسے عالمی سطح پر الٹرا میراتھون کی تاریخ کا ایک روشن باب قرار دیا جا رہا ہے۔