چین ایران کونیافضائی دفاعی نظام دینے کی تیاری کررہاہے، امریکی میڈیاکادعویٰ

امریکی میڈیانے دعویٰ کیاہےکہ چین آئندہ چند ہفتوں میں ایران کو نئے فضائی دفاعی نظام فراہم کرنےکی تیاری کررہا ہے۔امریکی ٹی وی رپورٹ میں انٹیلی جنس حکام  کے حوالے سےدعویٰ کیاگیا ہے کہ بیجنگ نئے فضائی دفاعی نظام کی کھیپ کسی تیسرے ملک کے ذریعےایران بھیجنے پر کام کررہا ہے۔

رپورٹ میں کہاگیاہے کہ  چین ایران کو کندھے پر رکھ کر چلائے جانے والے طیارہ شکن میزائل سسٹمز فراہم کرنے کی تیاری کر رہا ہے۔اس حوالے سے واشنگٹن میں چینی سفارتخانے کا کہنا ہے چین نے کبھی بھی تنازع کے کسی فریق کو ہتھیار فراہم نہیں کیے، امریکی ٹی وی پر زیر بحث معلومات درست نہیں ہیں، ایک ذمہ دار بڑی ریاست کے طور پر چین مسلسل اپنی بین الاقوامی ذمے داریاں پوری کرتا ہے۔

چینی سفارتخانے کے مطابق ہم امریکی فریق پر زور دیتے ہیں کہ وہ بے بنیاد الزامات لگانے، بدنیتی پر مبنی روابط قائم کرنے اور سنسنی پھیلانے سے گریز کرے۔