زیارت میں دہشت گردوں کا پولیس چوکی پر حملہ، 9 اہلکار شہید

بلوچستان کے ضلع زیارت میں دہشت گردوں نے پولیس چوکی پر بزدلانہ حملہ کر دیا، جس کے نتیجے میں دو ایس ایچ اوز سمیت 9 پولیس اہلکار شہید ہو گئے۔ ایس پی زیارت کے مطابق، یہ افسوسناک واقعہ زیارت کے علاقے کچ مانگی فیز تھری میں پیش آیا، جہاں گزشتہ رات سے دہشت گردوں اور پولیس کے درمیان شدید فائرنگ کا تبادلہ جاری تھا۔ حملے میں شہید ہونے والوں میں ایس ایچ او مانگی محمد حسین اور ایس ایچ او کواس صحبت خان بھی شامل ہیں۔ واقعہ کے فوراً بعد شہید اہلکاروں کی میتوں کو ڈی ایچ کیو ہسپتال زیارت منتقل کر دیا گیا ہے، جبکہ علاقے میں سکیورٹی فورسز اور پولیس کی بھاری نفری تعینات کر دی گئی ہے۔ پولیس حکام کا کہنا ہے کہ حملہ آوروں کی تلاش اور علاقے کو کلیئر کرنے کے لیے سرچ آپریشن شروع کر دیا گیا ہے اور شہید اہلکاروں کی قربانیاں رائیگاں نہیں جانے دی جائیں گی۔