انسانی سمگلنگ کیخلاف 59 ممالک میں عالمی کریک ڈاؤن، ایک ہزار سے زائد ملزم گرفتار

بین الاقوامی پولیس تنظیم ‘انٹرپول’ کی زیرِ نگرانی دنیا کے 59 ممالک میں انسانی سمگلنگ میں ملوث عالمی نیٹ ورکس کے خلاف اب تک کی سب سے بڑی کارروائی عمل میں لائی گئی ہے۔ ‘آپریشن گلوبل چین’ (Operation Global Chain) کے نام سے کی جانے والی اس کارروائی کے دوران قانون نافذ کرنے والے اداروں نے جنسی استحصال، جبری مشقت، مختلف مجرمانہ سرگرمیوں اور زبردستی بھیک منگوانے والے گروہوں کو نشانہ بنایا۔

اس عالمی آپریشن کے دوران متعدد بڑے منظم جرائم پیشہ نیٹ ورکس کا خاتمہ کیا گیا۔ کمبوڈیا میں ایک ایسے بڑے گروہ کو بے نقاب کیا گیا جو لوگوں کو آن لائن فراڈ اور سائبر کرائم سکیموں کا حصہ بنانے کے لیے اسمگل کر رہا تھا۔ دوسری جانب یورپ میں سوشل میڈیا پلیٹ فارمز کے ذریعے کم عمر لڑکیوں کو ورغلا کر جسم فروشی کے دھندے پر مجبور کرنے والے نیٹ ورک کو بھی جڑ سے اکھاڑ پھینکا گیا۔

انٹرپول حکام کے مطابق، اس گرینڈ آپریشن کے دوران مجموعی طور پر 2 ہزار 70 متاثرین کی نشاندہی کر کے انہیں بازیاب کرایا گیا، جن میں اکثریت خواتین اور بچوں کی ہے۔ کارروائی کے دوران 1 ہزار سے زائد افراد کو حراست میں لیا گیا ہے، جن میں سے 334 ملزمان براہِ راست انسانی سمگلنگ جبکہ 690 افراد اس سے منسلک دیگر سنگین جرائم کے الزامات کے تحت گرفتار کیے گئے۔

یہ تاریخی کارروائی انٹرپول نے یورپی یونین کی قانون نافذ کرنے والی ایجنسی ‘یوروپول’ (Europol) اور یورپی سرحدی سیکیورٹی ایجنسی ‘فرنٹیکس’ (Frontex) کے ساتھ مشترکہ تعاون سے سرانجام دی۔ انٹرپول کے اعلیٰ حکام کا کہنا ہے کہ اس آپریشن کے کامیاب نتائج اور حاصل ہونے والے ڈیٹا سے دنیا بھر میں انسانی سمگلنگ کے بدلتے ہوئے بین الاقوامی راستوں اور مجرموں کے نئے طریقہ کار (Modus Operandi) کو سمجھنے میں بڑی مدد ملی ہے۔