اسرائیل کا امریکا سے ترکیہ کو ایف 35 جنگی طیارے اور پرزے فروخت نہ کرنے کا مطالبہ

اسرائیل نے ایک بار پھر خطے میں فوجی برتری برقرار رکھنے کے لیے سفارتی کوششیں تیز کر دی ہیں۔ اسرائیلی وزیر اعظم بنجمن نیتن یاہو نے امریکہ سے مطالبہ کیا ہے کہ وہ ترکیہ کو ایف-35 جنگی طیاروں اور ان کے سپیئر پارٹس (پرزوں) کی فراہمی فوری طور پر روک دے۔

امریکی ٹی وی چینل کو دیے گئے ایک خصوصی انٹرویو میں اسرائیلی وزیر اعظم بنجمن نیتن یاہو نے مؤقف اختیار کیا کہ واشنگٹن کی جانب سے ترکیہ کو یہ جدید ترین جنگی طیارے فراہم کرنا خطے میں طاقت کے توازن کو شدید متاثر کرے گا۔ انہوں نے سخت الفاظ استعمال کرتے ہوئے کہا کہ واشنگٹن کو ترکیہ کو ‘بطور انعام’ اتنی جدید ترین فوجی ٹیکنالوجی فراہم نہیں کرنی چاہیے، کیونکہ ترکیہ کے صدر رجب طیب اردوان کھلم کھلا اسرائیل کی تباہی کے خواہاں ہیں۔

انٹرویو کے دوران اسرائیلی وزیر اعظم نے امریکی صدر ڈونلڈ ٹرمپ کے ساتھ کسی بھی قسم کے اختلافات کی سختی سے تردید کی۔ انہوں نے واضح کیا کہ امریکہ اور اسرائیل کے درمیان بعض تزویراتی معاملات پر اختلافِ رائے ضرور موجود ہے، لیکن بیشتر عالمی اور علاقائی امور پر دونوں ممالک کی سوچ اور مقاصد بالکل ایک جیسے ہیں۔ نیتن یاہو کا مزید کہنا تھا کہ ان کے صدر ڈونلڈ ٹرمپ کے ساتھ تعلقات انتہائی مثالی اور بہتر ہیں۔