چین: سمندری پانی پینے کے قابل بنانے کے لیے ٹیکنالوجی میں اہم پیشرفت

چائینیز اکیڈمی آف سائنسز کے محققین نے شمسی توانائی کی مدد سے سمندری پانی کو پینے کے قابل بنانے کی ٹیکنالوجی میں ایک انقلابی پیشرفت حاصل کی ہے، جس سے مستقبل میں صاف پانی کی پیداوار کی لاگت بوتل بند پانی سے بھی کم ہو سکتی ہے۔ سائنس دانوں نے ایک نیا تھری ڈی (3D) اسٹرکچر تیار کیا ہے، جس میں مضبوطی سے جڑی پولیمر زنجیریں اور کھوکھلے خول نما ڈھانچے شامل ہیں۔ یہ ڈھانچہ سورج کی حرارت سے پانی کو بخارات میں تبدیل کرنے کے عمل کو روایتی ٹیکنالوجی کے مقابلے میں 8.5 گنا زیادہ تیز بنا دیتا ہے۔ ماہرین کے مطابق موجودہ ڈی سیلینیشن ٹیکنالوجی فوسل فیول پر انحصار کے باعث مہنگی اور دور دراز علاقوں کے لیے مشکل ہے، تاہم یہ نئی سستی شمسی ایجاد مستقبل میں پانی کی عالمی قلت پر قابو پانے میں اہم کردار ادا کرے گی۔