نواز شریف کا 14 بچوں کی ہلاکت پر اظہارِ افسوس، مریم نواز شفاف انکوائری کے بعد مجرمان کو سزا دلوائیں گی

پاکستان مسلم لیگ (ن) کے قائد اور سابق وزیراعظم نواز شریف نے لاہور کے علاقے کاہنہ میں ٹیوشن سینٹر کی چھت گرنے کے نتیجے میں 14 معصوم بچوں کے جانی نقصان پر گہرے دکھ اور رنج کا اظہار کیا ہے۔

سوشل میڈیا پلیٹ فارم ‘ایکس’ (سابقہ ٹوئٹر) پر جاری اپنے ایک بیان میں قائد مسلم لیگ (ن) کا کہنا تھا کہ لاہور میں چھت گرنے سے 14 معصوم بچوں کے المناک جانی نقصان پر دلی رنج ہوا ہے۔ انہوں نے جاں بحق ہونے والے بچوں کو خراجِ عقیدت پیش کرتے ہوئے کہا کہ یہ ننھے پھول قوم کا مستقبل تھے اور دکھ کی اس مشکل گھڑی میں ان کی تمام تر ہمدردیاں سوگوار خاندانوں کے ساتھ ہیں۔

وزیر اعلیٰ پنجاب مریم نواز شریف کی جانب سے اٹھائے گئے اقدامات کا حوالہ دیتے ہوئے نواز شریف نے کہا کہ مریم نواز شریف نے مجھے بتایا ہے کہ وہ مصمم ارادے کے ساتھ اس افسوسناک واقعے کی شفاف اور غیرجانبدارانہ انکوائری کروا کر مجرمان کو قرار واقعی سزا دلوائیں گی۔ انہوں نے اپنے بیان کے اختتام پر دعا کی کہ اللہ تعالیٰ جاں بحق ہونے والے معصوم بچوں کو جوارِ رحمت میں اعلیٰ مقام دے، حادثے کے زخمیوں کو کامل و عاجل شفا عطا فرمائے اور پسماندگان کو یہ ناقابلِ تلافی صدمہ برداشت کرنے کے لیے صبرِ جمیل عطا فرمائے۔