پی ٹی آئی نے بہت اچھا بجٹ پیش کیا، صرف میرٹ پر کام ہو رہا ہے: بیرسٹر گوہر

پاکستان تحریک انصاف (پی ٹی آئی) کے چیئرمین بیرسٹر گوہر علی خان نے کہا ہے کہ تحریک انصاف کی حکومت نے خیبر پختونخوا میں ایک بہترین اور متوازن بجٹ پیش کیا ہے اور صوبے میں تمام امور صرف اور صرف میرٹ کی بنیاد پر چلائے جا رہے ہیں۔

پشاور میں میڈیا سے گفتگو کرتے ہوئے بیرسٹر گوہر نے صوبے میں ڈاکٹروں کی تعیناتی کے معاملے پر یوٹرن لینے والوں کو آڑے ہاتھوں لیا اور کہا کہ ڈاکٹرز کی تقرری پر کچھ لوگ بلاوجہ سیاست کر رہے ہیں۔ انہوں نے واضح کیا کہ اس سلسلے میں ان کی خلیق الرحمان سے بات چیت ہوئی ہے اور وہ ڈاکٹروں کی تقرری کے عمل سے مکمل مطمئن ہیں۔ ایک سوال کے جواب میں ان کا کہنا تھا کہ اس وقت (حکومت کے ساتھ) مذاکرات گراؤنڈ پر موجود نہیں ہیں اور پی ٹی آئی کی نظریں اب کشمیر کے انتخابات پر ہیں۔

محمود خان اچکزئی سے ملاقات کے برے بات کرتے انہوں نے کہا کہ اچکزئی صاحب سے ہاتھ ملانے کا یہ مطلب ہرگز نہیں کہ ہم نے ہار مان لی ہے۔ ہم عوام کے منتخب نمائندے ہیں اور عوام کے حقوق کے لیے بات کرتے رہیں گے۔ ہم بانی پی ٹی آئی کے حوالے سے ہر قانونی مسئلے پر عدالت سے رجوع کرتے ہیں۔ پارٹی کے اندرونی اختلافات کی افواہوں کو مسترد کرتے ہوئے بیرسٹر گوہر نے کہا کہ جمہوری اختلاف رائے ہر جگہ ہوتا ہے۔ انہوں نے بتایا کہ وہ ایم این ایز کے تحفظات کے حوالے سے وزیراعلیٰ سے بات کریں گے۔ انہوں نے دوٹوک انداز میں کہا کہ اس وقت کوئی بھی وزیراعلیٰ سہیل آفریدی کے خلاف نہیں ہے، ہم سب بانی پی ٹی آئی کے حکم کے پابند ہیں اور انہوں نے ہی سہیل آفریدی کو وزیراعلیٰ چنا ہے، اس لیے ہم سب ان کے ساتھ کھڑے ہیں۔ انہوں نے مزید کہا کہ بجٹ کے موقع پر بھی پارٹی متحد نظر آئی اور آئندہ بھی یہی یکجہتی دیکھنے کو ملے گی۔ علی امین گنڈاپور دوبارہ وزیراعلیٰ کی سیٹ کے خواہش مند نہیں ہیں، اور نہ ہی سہیل آفریدی کے خلاف کوئی سازش ہو رہی ہے اور نہ ہی انہیں تبدیل کیا جا رہا ہے۔