ٹیوشن سنٹرسانحہ میں بچ جانیوالی خاتون ٹیچر کا اسپتال سے پہلا بیان آگیا

صوبائی دارالحکومت کے علاقے کاہنہ میں ٹیوشن سینٹر کی چھت گرنے کے دلخراش واقعے کا مقدمہ درج کر کے مالک مکان سمیت 5 افراد کو حراست میں لے لیا گیا ہے۔ دوسری جانب لاہور جنرل ہسپتال میں زیرِ علاج متاثرہ خاتون ٹیچر انیلا کا بیان بھی سامنے آ گیا ہے۔

ہسپتال میں زیرِ علاج خاتون ٹیچر انیلا نے واقعے کی تفصیلات بتاتے ہوئے کہا کہ وہ خراب مالی حالات کے باعث گزشتہ دو سال سے چھوٹے بچوں کو ٹیوشن پڑھا رہی ہیں جبکہ ان کے شوہر منڈی کے پاس ریڑھی لگاتے ہیں۔ ان کا کہنا تھا کہ ٹیوشن میں مجموعی طور پر 30 سے 35 بچے آتے ہیں تاہم گزشتہ روز 20 سے 22 بچے موجود تھے۔خاتون ٹیچر کے مطابق بارش کی وجہ سے چھت ٹپکتی تھی جس کے باعث وہاں مرمت کا کام شروع کیا گیا تھا، مجھے اندازہ نہیں تھا کہ چھت گر جائے گی۔ یہ سب اللہ کی طرف سے ہوا ہے۔ میری اپنی بیٹی کی حالت اب بہتر ہے اور وہ ہسپتال سے ڈسچارج ہو چکی ہے لیکن میں ابھی تک اس سے مل نہیں پائی۔ ہسپتال انتظامیہ کے مطابق خاتون ٹیچر کی حالت اب خطرے سے باہر ہے اور انہیں ایک دو روز میں ہسپتال سے ڈسچارج کر دیا جائے گا۔ دوسری جانب صوبائی وزیر اطلاعات عظمیٰ بخاری نے اپنے بیان میں کہا کہ بچوں کے والدین کی تکلیف کو الفاظ میں بیان نہیں کیا جا سکتا، جبکہ وزیر تعلیم پنجاب نے معصوم بچوں کی ہلاکت کو ناقابلِ تلافی نقصان قرار دیا۔

واقعے کا مقدمہ انفورسمنٹ انسپکٹر نشتر زون کی مدعیت میں درج کر لیا گیا ہے۔ ایف آئی آر کے مطابق چھت پر جاری مرمتی کام اور غفلت کے باعث یہ جانی نقصان ہوا کیونکہ چھت زیادہ وزن ہونے کی وجہ سے گری۔ اس افسوسناک حادثے میں 14 بچے جاں بحق اور 8 زخمی ہوئے تھے۔ ڈی آئی جی آپریشنز فیصل کامران کا کہنا ہے کہ مکان مالک سمیت 5 افراد کو حراست میں لے لیا گیا ہے اور تفتیش مکمل ہونے پر سخت قانونی کارروائی عمل میں لائی جائے گی۔