جاپان فراڈ سے بچاؤ کیلئے ورچوئل پولیس افسر متعارف

جاپان نے ملک میں تیزی سے بڑھتے ہوئے آن لائن فراڈ اور سائبر دھوکا دہی کی لہر کے خلاف اپنی قومی مہم کے تحت ایک جدید ترین قدم اٹھاتے ہوئے ’اے آئی کو‘ (AIKO) نامی مصنوعی ذہانت (Artificial Intelligence) پر مبنی دنیا کی پہلی ورچوئل پولیس افسر کو میدان میں اتار دیا ہے۔

اوساکا پریفیکچرل پولیس (Osaka Prefectural Police) کی جانب سے متعارف کرائی گئی یہ ڈیجیٹل افسر ’اے آئی کو‘ ویڈیو شیئرنگ پلیٹ فارم ‘یوٹیوب’ پر ایک نوجوان جاپانی خاتون کی شکل اور آواز میں نمودار ہوتی ہے اور عوام کو مختلف قسم کے فراڈ سے بچاؤ کے طریقے اور سیکیورٹی گائیڈ لائنز فراہم کرتی ہے۔ اپنی معلوماتی ویڈیوز میں وہ شہریوں کو سختی سے خبردار کرتی ہے کہ اگر کوئی شخص ویڈیو کال پر خود کو پولیس افسر ظاہر کر کے پیسوں یا معلومات کا تقاضا کرے، تو غالب امکان یہی ہے کہ وہ کوئی آن لائن دھوکا باز (اسکیمر) ہے۔

دلچسپ بات یہ ہے کہ اس ورچوئل افسر کے نام یعنی ’اے آئی کو‘ میں ’اے آئی‘ سے مراد آرٹیفیشل انٹیلیجنس ہے، جبکہ ’کو‘ (Ko) جاپانی ثقافت میں خواتین کے ناموں کے آخر میں استعمال ہونے والا ایک انتہائی عام اور روایتی لاحقہ ہے۔ یہ ورچوئل پولیس افسر مارکیٹ میں ہونے والی حقیقی فراڈ کالز اور دھوکا بازوں کی گفتگوؤں کے ڈیٹا کی بنیاد پر تیار کی گئی ویڈیوز کے ذریعے مہم چلاتی ہے، تاکہ عوام کو لائیو دکھایا جا سکے کہ مجرم کس طرح معصوم لوگوں کو اپنے جال میں پھنساتے ہیں اور کن نشانیوں کو دیکھ کر فراڈ کی بروقت نشاندہی کی جا سکتی ہے۔

جاپانی حکام کے مطابق، اے آئی کو کا آغاز ایک ایسے حساس وقت میں کیا گیا ہے جب جاپان میں گزشتہ سال کے دوران آن لائن سرمایہ کاری، رومانوی تعلقات (Romance Scams) اور جعلی پولیس افسران یا مشہور شخصیات کے روپ میں ہونے والے فراڈ کے باعث شہریوں کو مجموعی طور پر دو ارب ڈالر سے زائد کا خطیر مالی نقصان اٹھانا پڑا ہے۔ پولیس کو امید ہے کہ اس اے آئی ٹیکنالوجی کے استعمال سے شہریوں میں آگاہی بڑھے گی اور سائبر کرائمز کی شرح میں نمایاں کمی آئے گی۔