پاکستان پیپلز پارٹی کو بڑا سیاسی جھٹکا، سابق وزیراعظم سردار تنویر الیاس پارٹی کی بنیادی رکنیت سے استعفیٰ

پاکستان پیپلز پارٹی (پی پی پی) کو آزاد کشمیر میں ایک بڑا سیاسی جھٹکا لگا ہے جہاں سابق وزیراعظم سردار تنویر الیاس خان نے پارٹی کی بنیادی رکنیت سے استعفیٰ دے دیا ہے اور اپنا استعفیٰ چیئرمین بلاول بھٹو زرداری کو ارسال کر دیا ہے۔ ذرائع کے مطابق یہ فیصلہ آزاد کشمیر کے آئندہ انتخابات کے لیے پارٹی ٹکٹوں کی تقسیم پر پیدا ہونے والے شدید اختلافات کے بعد سامنے آیا ہے، جہاں انہوں نے وسطی باغ، پاچھیوٹ اور نیلم سے ٹکٹ کے لیے درخواست دی تھی۔ امکان ہے کہ سردار تنویر الیاس کے ہمراہ ان کے سیاسی ساتھی بھی اگلے دو روز میں پیپلز پارٹی سے علیحدگی کا باقاعدہ اعلان کر دیں گے۔ سردار تنویر الیاس خان اب استحکامِ پاکستان پارٹی (آئی پی پی) میں شمولیت یا آزاد حیثیت میں ایک بڑے سیاسی گروپ کی قیادت کرتے ہوئے انتخابات میں حصہ لینے کے آپشنز پر غور کر رہے ہیں۔