اداکارہ فضا علی کو برطانوی پارلیمنٹ میں خصوصی اعزاز حاصل

پاکستان کی معروف اداکارہ، میزبان اور گلوکارہ فضا علی کو خواتین کے حقوق کے فروغ اور اہم سماجی مسائل پر مؤثر آواز بلند کرنے کے اعتراف میں برطانوی پارلیمنٹ میں ایک خصوصی اعزاز سے نوازا گیا ہے۔

برطانوی پارلیمنٹ میں منعقدہ اس باوقار اعزازی تقریب میں مختلف شعبہ ہائے زندگی سے تعلق رکھنے والی ممتاز عالمی اور کمیونٹی شخصیات نے شرکت کی۔ تقریب کے شرکا نے فضا علی کی سماجی خدمات، بالخصوص خواتین کو درپیش مختلف مسائل کو اجاگر کرنے اور معاشرے میں مثبت شعور بیدار کرنے کے لیے ان کی مسلسل کاوشوں کو زبردست خراجِ تحسین پیش کیا۔

برطانوی پارلیمنٹ سے یہ اہم اعزاز وصول کرنے کے بعد فضا علی نے تقریب سے خطاب کرتے ہوئے کہا کہ یہ اعزاز صرف میری ذاتی کامیابی نہیں ہے، بلکہ یہ دنیا بھر کی اس ہر خاتون کے لیے حوصلہ افزا پیغام ہے جو اپنے حقوق، ایک بااختیار مستقبل اور معاشرے میں مثبت تبدیلی لانے کے لیے جدوجہد کر رہی ہے۔ انہوں نے اس عالمی اعزاز کو پاکستان کی غیور خواتین کے نام کرتے ہوئے اس عزم کا اعادہ کیا کہ وہ مستقبل میں بھی سماجی برائیوں، ناانصافیوں اور خواتین کے حقوق کے تحفظ کے لیے اپنی آواز اسی طرح بلند کرتی رہیں گی۔