ممکنہ سیلابی صورتحال اور خطرات سے بچاؤ کے لیےاقدامات جامع روڈ میپ کے تحت ترتیب دیے جائیں۔وزیراعظم

وزیراعظم محمد شہباز شریف کی زیر صدارت اسلام آباد میں ایک اہم جائزہ اجلاس منعقد ہوا، جس میں مون سون سیزن کی پیشگی تیاریوں اور موسمیاتی تغیرات سے نبرد آزما ہونے کے لیے حکمت عملی طے کی گئی۔ اجلاس میں وفاقی وزراء، چیئرمین این ڈی ایم اے (NDMA) اور چاروں صوبوں کے چیف سیکرٹریز نے شرکت کی۔ وزیراعظم نے پاکستان کو ماحولیاتی خطرات سے سب سے زیادہ متاثرہ ملک قرار دیتے ہوئے وفاقی اور صوبائی اداروں کے درمیان مؤثر تعاون کو ناگزیر قرار دیا۔ انہوں نے وفاقی وزیر موسمیاتی تبدیلی اور چیئرمین این ڈی ایم اے کو تمام صوبوں اور آزاد کشمیر کا ہنگامی دورہ کرنے کی ہدایت کی، جبکہ وفاقی وزیر منصوبہ بندی احسن اقبال کی سربراہی میں ایک ہائی لیول ‘ایمرجنسی رسپانس کمیٹی’ بھی تشکیل دی گئی ہے۔ مزید برآں، قومی آبی تحفظ اور منصوبوں کی جلد تکمیل کے لیے بجٹ میں 330 ارب روپے کی اضافی رقم مختص کی گئی ہے۔ چیئرمین این ڈی ایم اے نے بریفنگ میں بتایا کہ دنیا بھر کی طرح پاکستان میں بھی جولائی کے دوران شدید گرمی کی لہر اور غیر معمولی بارشیں متوقع ہیں، جس کے لیے پیشگی اقدامات اٹھائے جا رہے ہیں۔