’’فون نمبر نہیں صرف نام‘‘، واٹس ایپ کا نیا دلچسپ فیچر متعارف

دنیا بھر میں سماجی رابطوں کی سب سے مقبول ترین ایپلی کیشن ‘واٹس ایپ’ نے صارفین کی پرائیویسی کو مزید محفوظ بنانے کے لیے ایک انقلابی تبدیلی کرتے ہوئے نیا ‘یوزر نیم’ (Username) فیچر متعارف کرانے کا باضابطہ اعلان کر دیا ہے۔ اس فیچر کے بعد اب صارفین کو کسی سے رابطہ کرنے کے لیے اپنا پرسنل فون نمبر دینے کی ضرورت نہیں رہے گی، بلکہ صرف نام بتانا ہی کافی ہوگا۔

رپورٹ کے مطابق، واٹس ایپ کا یہ نیا اقدام صارفین کی سیکیورٹی اور پرائیویسی کو مدنظر رکھتے ہوئے اٹھایا گیا ہے۔ اس فیچر کے تحت ہر صارف کو اپنا ایک مخصوص اور منفرد یوزر نیم منتخب کرنے کی سہولت ملے گی۔ یہ فیچر فعال (Activate) ہونے کے بعد فون نمبر کے بجائے صرف یہ آئی ڈی دینا ہی چیٹنگ شروع کرنے کے لیے کافی ہوگا۔ تاہم، کمپنی نے واضح کیا ہے کہ یوزر نیم رکھنا ہر صارف کے لیے لازمی نہیں ہوگا، بلکہ یہ اختیاری ہوگا۔

واٹس ایپ کے مطابق یوزر نیم زیادہ سے زیادہ 35 حروف پر مشتمل ہو سکے گا، اور صارفین جب چاہیں اپنی مرضی سے اس یوزر نیم کو تبدیل یا مکمل طور پر حذف (Delete) کر سکیں گے۔ یوزر نیم کے ذریعے رابطہ قائم ہونے کے باوجود پرائیویسی کنٹرول صارف کے ہاتھ میں رہے گا۔ اگر کوئی ناپسندیدہ شخص پیغامات بھیجتا ہے، تو اسے بلاک یا رپورٹ کرنے کا آپشن بدستور موجود رہے گا۔کمپنی نے سیکورٹی کے پیشِ نظر یہ بھی صاف کر دیا ہے کہ کسی بھی قسم کے دھوکے، فراڈ یا جعل سازی سے بچنے کے لیے معروف عالمی شخصیات اور اعلیٰ سرکاری عہدیداروں کے نام عام صارفین کے لیے دستیاب نہیں ہوں گے تاکہ کوئی ان کی شناخت کا غلط استعمال نہ کر سکے۔اس فیچر کے متعارف ہونے سے واٹس ایپ صارفین اب اپنے فون نمبرز کو اجنبی لوگوں سے محفوظ رکھ سکیں گے اور محض یوزر نیم کا تبادلہ کر کے باآسانی گفتگو کا آغاز کر سکیں گے۔