پاکستان نے افغانستان میں دہشت گردوں کیخلاف کارروائی سے متعلق بھارتی بیان مسترد کر دیا

پاکستان نے افغانستان میں دہشت گردوں کے خلاف کی جانے والی کارروائیوں سے متعلق بھارتی وزارت خارجہ کے بیان کو یکسر مسترد کرتے ہوئے اسے من گھڑت اور حقائق کے منافی قرار دے دیا ہے۔

ترجمان دفتر خارجہ طاہر اندرابی نے بھارتی پروپیگنڈے کا جواب دیتے ہوئے واضح کیا کہ افغانستان میں پاکستان کی جانب سے ہونے والی کارروائیاں دہشت گردوں کے بنیادی ڈھانچے کے خلاف تھیں جو کہ پاکستان کی جائز اور قانونی کارروائیاں ہیں۔ انہوں نے کہا کہ اس معاملے پر بھارت کا بیان سراسر بے بنیاد ہے۔

ترجمان دفتر خارجہ نے بھارت کے دوہرے معیار کو بے نقاب کرتے ہوئے کہا کہ بھارت ایک طرف غیر قانونی طور پر مقبوضہ جموں و کشمیر میں معصوم کشمیری عوام کے حقِ خودارادیت کو مسلسل دبانے میں مصروف ہے، تو دوسری طرف وہ افغان سرزمین سے پاکستان کے خلاف سرگرم دہشت گرد گروہوں کی پشت پناہی کر رہا ہے۔ بھارت مسلسل افغانستان کی سرزمین کو پاکستان کے خلاف استعمال کر رہا ہے۔ طاہر اندرابی کا مزید کہنا تھا کہ بھارت اقوامِ متحدہ کی سلامتی کونسل کی پابندیوں کی کھلم کھلا خلاف ورزی کرتے ہوئے خطے میں امن و استحکام کو نقصان پہنچانے والے ملک کا کردار ادا کر رہا ہے، اس لیے اس کے بے بنیاد الزامات اور اشتعال انگیز بیانات کو عالمی سطح پر کوئی اہمیت نہیں دی جانی چاہیے۔ انہوں نے سخت لہجے میں کہا کہ جو ملک خود اپنے ہمسایہ ممالک کے اندرونی معاملات میں مداخلت کی تاریخ رکھتا ہو، اس کی جانب سے ایسا بیان آنا مضحکہ خیز ہے۔ ترجمان دفتر خارجہ نے اس عزم کا اعادہ کیا کہ پاکستان اپنے شہریوں کی سلامتی اور ملکی تحفظ کو یقینی بنانے کے لیے بین الاقوامی قوانین کے دائرہ کار میں رہتے ہوئے ہر ممکن اور ضروری اقدام اٹھاتا رہے گا۔