بھارت؛ اسکول کے 35 طلبہ کے ہاتھوں پر پراسرار گہرے زخم کے نشانات

بھارتی ریاست چھتیس گڑھ کے ضلع دھمتری کے علاقے کرود بلاک میں ایک مڈل اسکول کے 35 طلبہ کے ہاتھوں پر پراسرار زخموں کے نشانات نے اسکول انتظامیہ، والدین اور قانون نافذ کرنے والے اداروں کو حیرت زدہ کر دیا ہے۔ ان بچوں نے بلیڈ یا کسی نوکیلی چیز سے اپنے ہاتھوں کو زخمی کیا ہے، لیکن حیران کن طور پر کوئی بھی بچہ اس کی وجہ بتانے کو تیار نہیں ہے۔

یہ لرزہ خیز انکشاف اس وقت ہوا جب ایک بچے کے والدین نے اس کے ہاتھوں پر کٹ کے نشانات دیکھے۔ بچے کی خاموشی پر جب والدین نے اسکول جا کر دیگر طلبہ سے پوچھا، تو معلوم ہوا کہ یہ کوئی انفرادی واقعہ نہیں بلکہ اسکول کے 35 بچے اسی طرح کے زخموں کا شکار ہیں۔ اس اطلاع کے بعد پورے گاؤں میں صدمے اور خوف کی لہر دوڑ گئی ہے۔

واقعے کی سنگینی کے پیشِ نظر محکمہ صحت، محکمہ تعلیم اور ماہرینِ نفسیات کی ٹیموں نے اسکول کا دورہ کیا ہے۔ ابتدائی طور پر اسے کسی آن لائن گیم، سوشل میڈیا چیلنج یا گروہی دباؤ (Peer Pressure) کا نتیجہ قرار دیا جا رہا ہے، تاہم بچے ابھی تک اس کی اصل وجہ بتانے سے گریزاں ہیں۔ اسکول انتظامیہ نے ہنگامی بنیادوں پر والدین کا اجلاس طلب کیا ہے اور اساتذہ کو ہدایت کی گئی ہے کہ وہ بچوں کی ہر نقل و حرکت پر کڑی نظر رکھیں۔