بلاول بھٹو زرداری کا قائدِ عوام شہید ذوالفقار علی بھٹو کو یومِ پیدائش پر خراجِ عقیدت

پاکستان پیپلز پارٹی کے چیئرمین بلاول بھٹو زرداری نے قائدِ عوام، ملک کے پہلے منتخب وزیراعظم شہید ذوالفقار علی بھٹو کے یومِ پیدائش کے موقع پر اپنے پیغام میں انہیں شاندار خراجِ عقیدت پیش کرتے ہوئے کہا ہے کہ شہید ذوالفقار علی بھٹو پاکستان کے محروم، مظلوم اور پسے ہوئے طبقات کی لازوال آواز تھے۔

بلاول بھٹو زرداری نے کہا کہ شہید ذوالفقار علی بھٹو نے عوام کو وقار، شناخت اور امید دی اور یہ انقلابی سوچ متعارف کروائی کہ اصل طاقت کا سرچشمہ عوام ہیں۔ ان کا کہنا تھا کہ روٹی، کپڑا اور مکان کے فلسفے سے لے کر 1973ء کے متفقہ آئین تک، بھٹو شہید نے غریب عوام کے خوابوں کو ریاستی ایجنڈا بنایا۔

چیئرمین پیپلز پارٹی نے کہا کہ پاکستان کے ناقابلِ تسخیر دفاع کی بنیاد بھی شہید ذوالفقار علی بھٹو نے ایٹمی پروگرام کا آغاز کر کے رکھی۔ انہوں نے واضح کیا کہ بھٹو شہید کی شہادت ان کے نظریات کو خاموش نہ کر سکی۔

بلاول بھٹو زرداری کے مطابق قائدِ عوام کے نظریات آج بھی نسل در نسل ظلم، جبر اور ناانصافی کے خلاف جدوجہد کا حوصلہ عطا کر رہے ہیں۔ انہوں نے کہا کہ دار و رسن پر بھی قائدِ عوام نے پاکستان کو جرات، خودمختاری اور امید کا ایک دائمی ورثہ عطا کیا۔

پیغام میں بلاول بھٹو زرداری نے اس عزم کا اظہار کیا کہ پاکستان پیپلز پارٹی قائدِ عوام شہید ذوالفقار علی بھٹو اور شہید محترمہ بینظیر بھٹو کے وژن پر مکمل طور پر کاربند ہے اور ایک جمہوری، منصفانہ اور عوام دوست پاکستان کی تعمیر کے لیے اپنی جدوجہد جاری رکھے گی۔

انہوں نے کہا کہ شہید ذوالفقار علی بھٹو ہر اس آواز میں زندہ ہیں جو حقوق کی بات کرتی ہے، ہر اس مطالبے میں زندہ ہیں جو مساوات کے لیے اٹھتا ہے اور ہر اس خواب میں زندہ ہیں جو ایک ہمدرد، جمہوری اور سربلند پاکستان کا تصور رکھتا ہے۔