گلوکار اریجیت سنگھ بھی بھارت میں احتجاج کرنے والے طلبہ کی آواز بن گئے

معروف بھارتی گلوکار اریجیت سنگھ نے جنتَر منتر پر احتجاج کرنے والے طلبہ پر دہلی پولیس کی جانب سے کیے جانے والے تشدد اور لاٹھی چارج کی شدید الفاظ میں مذمت کی ہے۔

گلوکار نے سوشل میڈیا پلیٹ فارم ‘ایکس’ (سابقہ ٹوئٹر) پر متعدد پوسٹس کے ذریعے اپنے شدید ردِعمل کا اظہار کرتے ہوئے کہا کہ طلبہ کے خلاف طاقت کا استعمال کسی صورت قابلِ قبول نہیں۔ انہوں نے لکھا، “میں وہ ویڈیوز دیکھ رہا ہوں جن میں یونیفارم پہنے ہوئے انسان غنڈوں جیسا رویہ اختیار کیے ہوئے ہیں۔” ایک اور جذباتی پوسٹ میں اریجیت سنگھ نے سیاست دانوں اور پولیس کو مخاطب کرتے ہوئے لکھا، “اب تو یہاں طلبہ کو مارا جا رہا ہے۔ ہیلو نیتا، منتری! ہیلو دہلی پولیس، کیا آپ لوگوں کو شرم نہیں آتی؟ یہ کیا چل رہا ہے! کیا آپ نے خود کو خدا سمجھ لیا ہے؟ یاد رکھیے، ہر چیز یاد رکھی جائے گی۔”

احتجاج کی حمایت کرنے پر جب ایک صارف نے تبصرہ کیا کہ اس اقدام سے اریجیت نے ان کی نظر میں اپنا احترام کھو دیا ہے، تو گلوکار نے بے باک جواب دیتے ہوئے کہا، “مجھے اس کی ذرا پرواہ نہیں کہ کوئی میری عزت کرتا ہے یا نہیں، اور نہ ہی مجھے کسی کے خیالات سے کوئی غرض ہے۔ ہر شخص کو اپنی رائے کا حق ہے۔ میرا مداح ہونے کا مطلب یہ ہرگز نہیں کہ میں آپ سے صرف خوشامدانہ یا میٹھی باتیں کروں۔”