فریال گوہر کا تشدد سے حمل ضائع ہونے کا الزام؛ جمال شاہ کا ردعمل سامنے آگیا

معروف اداکارہ فریال گوہر نے ایک مارننگ شو کے دوران اپنے سابق شوہر اور سینئر اداکار جمال شاہ پر شادی کے دوران بدترین جسمانی تشدد اور حمل ضائع ہونے کے سنگین الزامات عائد کیے ہیں۔ ان انکشافات کے بعد جمال شاہ نے سوشل میڈیا پر اپنا تفصیلی ردِعمل جاری کرتے ہوئے ان تمام الزامات کی سخت تردید کی ہے۔ جمال شاہ کا کہنا ہے کہ ان کی 5 سالہ شادی کے دوران کبھی کوئی جسمانی تشدد نہیں ہوا اور دونوں کی علیحدگی انتہائی مہذب انداز میں ہوئی تھی۔ انہوں نے وضاحت کی کہ 1985 میں حمل ضائع ہونے کی وجہ تشدد نہیں بلکہ ایک حادثہ تھا، جبکہ لندن میں تعلیم کے دوران بچے کی کوئی پلاننگ نہیں تھی۔ جمال شاہ نے مزید بتایا کہ انہوں نے اپنی ماضی کی زندگی پر ڈراما سیریل بنانے سے انکار کر دیا تھا اور وہ اب بھی فریال گوہر کے لیے نیک تمناؤں کا اظہار کرتے ہیں۔