معروف امریکی گلوکار لیونل رچی کنسرٹ کے بعد اسپتال منتقل

سینٹ لوئس: معروف امریکی گلوکار اور موسیقی کی دنیا کی نامور شخصیت لیونل رچی کو سینٹ لوئس میں کنسرٹ کے بعد اچانک طبیعت ناساز ہونے پر ہسپتال منتقل کر دیا گیا ہے، جہاں ڈاکٹرز ان کا طبی معائنہ کر رہے ہیں۔

امریکی میڈیا رپورٹس کے مطابق 77 سالہ لیونل رچی نے 29 اگست کی رات سینٹ لوئس کے فاریسٹ پارک میں واقع ’دی میونی‘ (The Muny) میں لائیو پرفارمنس دی۔ شو کے اختتام پر وہ خود مقامی ہسپتال پہنچے جہاں ابتدائی معائنے کے بعد انہیں انتہائی نگہداشت کے یونٹ (ICU) میں منتقل کر دیا گیا۔ ڈاکٹرز فی الوقت اس بات کا جائزہ لے رہے ہیں کہ آیا گلوکار کی حالت پانی کی شدید کمی (Dehydration) کے باعث بگڑی۔

کنسرٹ میں موجود شائقین کے مطابق پرفارمنس کے اختتامی حصے میں لیونل رچی کچھ نڈھال اور مشکل میں نظر آئے۔ اپنے مشہور گانے ’آل نائٹ لانگ‘ کے دوران انہوں نے اسٹیج پر کرسی منگوا کر بیٹھ کر اپنی پرفارمنس مکمل کی۔ ذرائع کا کہنا ہے کہ وہ احتیاطاً ہسپتال میں طبی نگہداشت میں ہیں اور انہیں منگل تک ڈسچارج کیے جانے کی امید ہے۔ واضح رہے کہ رواں سال کے دوران لیونل رچی کی صحت سے متعلق یہ دوسرا واقعہ ہے۔