معروف شاعر احمد راہی کو ہم سے بچھڑے 24 برس بیت گئے

لاہور: اردو اور پنجابی زبان کے ممتاز شاعر، صحافی اور بے مثال فلمی نغمہ نگار احمد راہی کی 24 ویں برسی آج عقیدت و احترام کے ساتھ منائی جا رہی ہے۔

12 نومبر 1923 کو امرتسر میں پیدا ہونے والے احمد راہی کا اصل نام غلام احمد تھا۔ انہوں نے ابتدائی تعلیم کے دوران ہی شاعرانہ سفر کا آغاز کیا اور معروف شاعر سیف الدین سیف سے اصلاح لیتے رہے۔ قیامِ پاکستان کے بعد وہ لاہور منتقل ہو گئے، جہاں ان کے دوست ساحر لدھیانوی بھارت جانے سے قبل ادبی جریدے ’سویرا‘ کی ادارت ان کے سپرد کر گئے۔ 1953 میں شائع ہونے والا ان کا پہلا پنجابی شعری مجموعہ ’ترنجن‘ اتنا مقبول ہوا کہ اسے تعلیمی نصاب کا حصہ بنایا گیا۔

احمد راہی نے 1948 میں سعادت حسن منٹو کے مشورے پر فلم ’بیلی‘ سے گیت نگاری کا آغاز کیا اور اپنے کیریئر میں 100 سے زائد فلموں کے لیے 300 سے زیادہ لازوال گیت تحریر کیے۔ ان کی نغمہ نگاری نے ’ہیر رانجھا‘، ’مرزا جٹ‘، ’سسی پنوں‘ اور ’یکے والی‘ جیسی تاریخی فلموں کو بے مثال کامیابی سے ہمکنار کیا۔ اردو فلم ’بازار‘ کے مشہور گیت پر انہیں نگار ایوارڈ سے بھی نوازا گیا۔ پنجابی و اردو ادب اور فلمی دنیا کا یہ روشن ستارہ 2 ستمبر 2002 کو ہمیشہ کے لیے غروب ہو گیا تھا، تاہم ان کے تحریر کردہ دلفریب نغمے آج بھی شائقین کے دلوں میں زندہ ہیں۔