برنی سینڈرز کی ٹرمپ پر کڑی تنقید، ایران جنگ ختم کرنے کا مطالبہ

امریکی سینیٹر برنی سینڈرز نے صدر ڈونلڈ ٹرمپ کی پالیسیوں کو شدید تنقید کا نشانہ بناتے ہوئے ایران کے خلاف جاری جنگ کو فوری طور پر ختم کرنے کا مطالبہ کیا ہے۔ برنی سینڈرز نے اپنے بیان میں کہا کہ امریکی عوام یہ نہیں چاہتے کہ آبنائے ہرمز کا نام تبدیل کر کے صدر کے نام سے منسوب کیا جائے، بلکہ وہ اس غیر قانونی جنگ کا خاتمہ چاہتے ہیں۔ انہوں نے نشاندہی کی کہ اس جنگ کے باعث امریکہ میں پیٹرولیم مصنوعات کی قیمتوں میں شدید اضافہ ہوا ہے، جہاں ڈیزل 5.69 ڈالر اور پیٹرول 4.12 ڈالر فی گیلن تک پہنچ چکا ہے۔ برنی سینڈرز نے صدر ٹرمپ کو سخت سست کہتے ہوئے زور دیا کہ وہ کسی ’دیوانے بادشاہ‘ کے بجائے ایک ذمہ دار صدر کی طرح برتاؤ کریں۔