پمز ہسپتال میں مبینہ طبی غفلت، پھیپھڑوں کے بجائے جگر کی بائیوپسی، مریضہ جاں بحق

اسلام آباد کے پمز ہسپتال میں ڈاکٹروں کی سنگین مبینہ غفلت کا انکشاف سامنے آیا ہے، جہاں پھیپھڑوں کے مرض میں مبتلا خاتون مریضہ عابدہ پروین کی پھیپھڑوں کے بجائے جگر کی بائیوپسی کر دی گئی، جس کے بعد وہ جاں بحق ہو گئیں۔ مریضہ کا تعلق آزاد کشمیر کے علاقے ڈڈیال سے تھا اور انہیں 9 دسمبر کو پمز ہسپتال کے پلمونولوجی ڈیپارٹمنٹ میں داخل کیا گیا تھا۔

لواحقین کے مطابق ایچ او ڈی پلمونولوجی ڈاکٹر محمد اسرار کے فیصلے پر 16 دسمبر کو لنگز بائیوپسی کی گئی، تاہم چند گھنٹوں بعد ہی مریضہ کی موت واقع ہو گئی۔ بعد ازاں شوکت خانم لیبارٹری کی بائیوپسی رپورٹ میں انکشاف ہوا کہ پھیپھڑوں کے بجائے جگر کا ٹشو نکالا گیا تھا۔

واقعے کے بعد لواحقین نے اسلام آباد ہیلتھ کیئر ریگولیٹری اتھارٹی میں درخواست دائر کر دی ہے، جس میں ڈاکٹر محمد اسرار، ڈاکٹر ہارون اشرف خان سمیت پروسیجر روم میں موجود دیگر ڈاکٹروں اور عملے کو ذمہ دار قرار دیا گیا ہے۔ اتھارٹی حکام کے مطابق درخواست موصول ہوتے ہی معاملے کی تحقیقات کا آغاز کر دیا گیا ہے۔