پاکستان کے مایہ ناز لوک اور صوفی گلوکارعلّن فقیر کی آج برسی منائی جارہی ہے

سندھ کی دھرتی سے ابھرنے والی امن، محبت اور تصوف کی لازوال آواز، مایہ ناز لوک اور صوفی گلوکار علّن فقیر کی برسی آج عقیدت و احترام سے منائی جا رہی ہے۔ علّن فقیر محض ایک گلوکار نہیں بلکہ صوفیانہ روایات کے سچے امین تھے، جنہوں نے سندھ کے عظیم صوفی شاعر شاہ عبداللطیف بھٹائی کے پیغام کو دنیا کے کونے کونے تک پہنچایا۔

ان کا مخصوص اندازِ گائیکی، سر پر سندھی پگڑی، ہاتھ میں یکتارا اور چہرے پر رقص کرتی مسکراہٹ ان کی پہچان تھی۔ معروف گلوکار محمد علی شہکی کے ساتھ ان کا گایا ہوا مقبولِ عام نغمہ “تیرے عشق میں جو بھی ڈوب گیا” آج بھی دنیا بھر میں زبان زدِ عام ہے اور سننے والوں پر وجد طاری کر دیتا ہے۔

حکومتِ پاکستان کی جانب سے موسیقی کے شعبے میں گراں قدر خدمات پر انہیں صدارتی تمغہ برائے حسنِ کارکردگی (پرائیڈ آف پرفارمنس) سے بھی نوازا گیا۔ تصوف کے رنگ میں رنگا یہ درویش صفت فنکار 4 جولائی 2000ء کو اس فانی دنیا سے کوچ کر گیا تھا، لیکن ان کا یکتارا، ان کی تانیں اور ان کا امن و محبت کا پیغام آج بھی لوگوں کے دلوں میں زندہ ہے۔